Qindra protestues dolën në rrugët e Karakasit dhe qyteteve të tjera të Venezuelës të hënën pas fitores së presidentit Nicolas Maduro në zgjedhjet presidenciale të së dielës. Gjatë demonstratës së paku një person ka mbetur i vrarë, ndërsa disa të tjerë janë plagosur.
Në rrjetet sociale po qarkullojnë video të njerëzve që djegin posterët e fushatës së Maduros dhe rrëzojnë një statujë të paraardhësit të Maduros, Hugo Chavez. Të tjerë thërrasin “Do të bjerë edhe ai, do të bjerë edhe ai, do të bjerë kjo qeveri”, ndërsa disa demonstrues në shenjë proteste godasin tenxheret dhe tiganët.
Rrugët janë bllokuar me goma që digjen dhe policia ka përdorur gaz lotsjellës për të shpërndarë protestuesit që i afrohen Pallatit Miraflores, rezidencës presidenciale.
Protestat e paparalajmëruara fillimisht shpërthyen në disa pjesë të Karakasit dhe më pas filluan të përhapen shpejt në të gjithë qytetin dhe pjesë të tjera të vendit.
Demonstratat vijnë një ditë pasi komisioni zgjedhor njoftoi se Maduro ishte rizgjedhur për një mandat tjetër presidencial gjashtëvjeçar me 51 për qind të votave, krahasuar me 44 përqind për liderin e opozitës Edmundo Gonzalez.
Opozita i hodhi poshtë rezultatet, duke pretenduar se ishin të rreme. Disa sondazhe dalëse të publikuara gjatë ditës treguan një fitore për kandidatin e opozitës Gonzalez dhe trupi zgjedhor nuk publikoi rezultatet nga qendrat e votimit në të gjithë vendin. Udhëheqësja e opozitës Maria Corina Machado tha të hënën se Gonzalez kishte më shumë se 70 për qind të votave.
Udhëheqësit botërorë dhe vëzhguesit e zgjedhjeve hodhën dyshime mbi pretendimin e fitores së Maduros dhe kërkuan një numërim të plotë të votave.
