Presidenti rus, Vladimir Putin dhe homologu i tij kongolez, Denis Sassou Nguesso, pas një takimi në Moskë janë zotuar se do të kundërshtojnë neokolonializmin në çdo formë, transmeton Anadolu.
Nguesso marrëdhëniet me Rusinë i quajti “miqësore dhe solidare”, si dhe shprehu mirënjohjen për ndihmën e saj në luftën kundër kolonializmit, duke theksuar se kjo luftë vazhdon.
Presidenti kongolez u zotua të bëjë përpjekje për t’i çuar marrëdhëniet me Rusinë në një nivel të ri dhe për të hedhur themelet për bashkëpunim afatgjatë.
Putin, nga ana e tij, theksoi se Rusia ka prioritet zhvillimin e lidhjeve me vendet afrikane, duke vlerësuar kontributin personal të homologut të tij kongolez në zgjerimin e lidhjeve dypalëshe.
Vitet e fundit, Rusia ka punuar për të forcuar lidhjet me vendet afrikane.
“Ju keni marrë pjesë në dy samite Rusi-Afrikë. Ju po bëni përpjekjet e nevojshme për të zhvilluar bashkëpunimin tonë në të gjitha fushat. Po i referohemi nivelit politik, ku (marrëdhëniet) janë zhvilluar dukshëm kohët e fundit, edhe lidhjet tregtare dhe ekonomike”, tha Putin.
Ai gjithashtu falënderoi presidentin kongolez për koordinimin në çështjet ndërkombëtare.
Para takimit, Putin i dorëzoi Nguesso-s Urdhrin e Nderit, një çmim shtetëror i Federatës Ruse.
