Një raport i publikuar nga njësia libaneze e reagimit ndaj krizave tha se besohet se afro 1.2 milionë persona janë zhvendosur nga shtëpitë e tyre në Liban si rezultat i përshkallëzimit të luftës mes Izraelit e Hezbollahut, raporton agjencia “AP”.
Sigurimi i Përgjithshëm Libanez regjistroi më shumë se 250 mijë qytetarë sirianë dhe 82 mijë qytetarë libanezë që kanë kaluar në territorin sirian midis 23 shtatorit dhe 30 shtatorit, thuhet në raport.
Gati 164 mijë jetojnë nëpër strehimore në Liban.
Mes tyre janë Fatima Abdul Nabi dhe vajza e saj e porsalindur. Vajza e saj mbushi 10 ditë më 23 shtator, kur Izraeli filloi një bombardim të shkallës së gjerë në jug të Libanit, për të cilin tha se kishte qëllim largimin e grupit militant Hezbollah nga kufiri.
“Ata filluan të godasin fshatin tonë dhe thanë se duhej të largoheshim nga fshati, kështu që ne u larguam”, tha Abdul Nabi.
