Hulusi Akar thekson në telefonatë se Turqia dhe SHBA janë aleatë të rëndësishëm
Ministri turk i Mbrojtjes Hulusi Akar dhe sekretari amerikan i mbrojtjes Lloyd Austin diskutuan çështjet dypalëshe dhe rajonale të mbrojtjes dhe sigurisë në një telefonatë të mërkurën.
Akar theksoi se Turqia dhe SHBA janë aleatë të rëndësishëm, thuhet në një deklaratë të Ministrisë së Mbrojtjes Kombëtare të Turqisë.
Duke iu referuar operacioneve ndërkufitare të Turqisë në Irakun verior dhe Siri, Akar tha se operacionet kundër terrorizmit po kryhen në përputhje me të drejtën e vetëmbrojtjes sipas nenit 51 të Kartës së OKB-së për të garantuar sigurinë e kombit turk.
Ai gjithashtu theksoi se objektivi i vetëm në operacione ishin terroristët dhe se Turqia kurrë nuk synon forcat e koalicionit apo civilët.
Bashkëpunimi dhe solidariteti në luftën kundër terrorizmit do të kontribuojnë në paqen dhe sigurinë rajonale dhe globale, tha ai, duke nënvizuar se në këtë kontekst, Turqia është e gatshme për bashkëpunim kundër DAESH/ISIS dhe të gjitha organizatave të tjera terroriste.
Kohët e fundit, Turqia nisi Operacionin Kthetra-Shpata në Irakun verior dhe Sirinë, një fushatë ajrore ndërkufitare kundër grupit terrorist PKK/YPG, i cili ka strehë të paligjshme përgjatë kufirit të Irakut dhe Sirisë, ku planifikojnë dhe ndonjëherë ekzekutojnë sulme në tokën turke.
Pas nisjes së operacionit ajror më 20 nëntor, presidenti turk Rexhep Tajip Erdogan kishte sinjalizuar gjithashtu një operacion tokësor në Irakun verior dhe veriun e Sirisë për të eliminuar kërcënimin terrorist.
Në fushatën e saj terroriste më shumë se 35-vjeçare kundër Turqisë, PKK – e listuar si një organizatë terroriste nga Turqia, SHBA dhe Bashkimi Evropian – ka qenë përgjegjëse për vdekjen e më shumë se 40,000 njerëzve, duke përfshirë gra, fëmijë dhe foshnja. YPG është dega siriane e grupit terrorist. /mesazhi
