Shefi i OKB-së, Antonio Guterres iu lut shteteve donatore që të “garantonin vazhdimësinë” e agjencisë palestineze të refugjatëve UNRWA pas disa ndërprerjeve të financimit mbi akuzat për përfshirje të stafit në sulmin e Hamasit në Izrael më 7 tetor.
“Ndërsa i kuptoj shqetësimet e tyre – unë vetë u tmerrova nga këto akuza – u bëj thirrje me forcë qeverive që kanë pezulluar kontributet e tyre për të garantuar, të paktën, vazhdimësinë e operacioneve të UNRWA-s”, tha Guterres në një deklaratë.
“Aktet e supozuara të neveritshme të këtyre anëtarëve të stafit duhet të kenë pasoja. Por dhjetëra mijëra burra dhe gra që punojnë për UNRWA, shumë në disa nga situatat më të rrezikshme për punonjësit humanitarë, nuk duhet të penalizohen,” shtoi ai.
“Nevojat e rënda të popullatave të dëshpëruara të cilave u shërbejnë duhet të plotësohen.”
Guterres konfirmoi se 12 punonjës të UNRWA janë përmendur në akuzat, të cilat Kombet e Bashkuara po hetojnë.
