Kuvendi i Shqipërisë ka miratuar deklaratën mbi nisjen e iniciativës për abrogimin e ligjit të luftës të Greqisë me Shqipërinë, propozuar nga grupi parlamentar “Drejtësi dhe Integrim” i Partisë Drejtësi, Integrim dhe Unitet (PDIU), raporton Anadolu.
Deklarata “Për forcimin e bashkëpunimit me Republikën e Greqisë dhe heqjen e ligjit të luftës”, u miratua në seancën e sotme parlamentare me 96 vota pro, asnjë kundër dhe asnjë abstenim, nga 140 deputetë që ka Kuvendi i Shqipërisë.
Kryetari i PDIU-së, Shpëtim Idrizi, në fjalën e tij në seancë u shpreh se mbajtja në fuqi e këtij ligji edhe pas 84 vitesh është “një fyerje e integritetit, sovranitetit dhe dinjitetit tonë kombëtar dhe nuk ka vend në marrëdhëniet midis dy vendeve”.
“Deklarata është dëshmi e politikës tonë paqësore, por të vendosur për të gjetur një zgjidhje pas 84 vitesh në lidhje me një absurd juridik të mbështetur mbi një absurd historik siç është ligji i luftës që Greqia mban me Shqipërinë”, tha Idrizi.
Kryetari i grupit parlamentar të partisë në pushtet, Partisë Socialiste të Shqipërisë, Bledar Çuçi, në fjalën e tij tha se kanë kërkuar përmes dialogut dhe mirëkuptimit që ky ligj të shfuqizohet për t”i dhënë, sipas tij, një dinamikë të re bashkëpunimit mes Greqisë dhe Shqipërisë.
“Kur po i afrohemi dekadës së tretë të shekullit 21 dhe teksa Shqipëria dhe Greqia kanë një traktat miqësie si dhe janë anëtarë dhe aleatë në aleancën politike dhe ushtarake më të fuqishme të botës sot, në NATO, mbajtja ende formalisht në fuqi e këtij ligji dhe për rrjedhojë pasojave që ai sjellë është një absurditet i madh”, tha Çuçi.
Sipas PDIU-së, Ligji i Luftës Nr. 2636/40 mbetet ende në fuqi dhe “vijon të prodhojë disa nga efektet negative që lindin kur shtetet janë në gjendje lufte”.
PDIU thekson se ligji në fjalë ushtron implikime të rëndësishme në kufizimin e të drejtave themelore të shtetasve shqiptarë dhe “është një akt që mban gjallë irredentizmin e qarqeve të caktuara ekstremiste greke”.
Sipas deklaratës, Kuvendi i Shqipërisë i kërkon Këshillit të Ministrave të Shqipërisë të bëjë çdo përpjekje me Qeverinë e Greqisë për abrogimin e ligjit të luftës.
Gjithashtu bëhet thirrje që të krijohet një grup pune mes dy parlamenteve që të kontribuojnë zyrtarisht në këtë iniciativë.
Në vitin 1940, Mbretëria e Greqisë shpalli Ligjin e Luftës me dekretin numër 2636, të pasuar nga një sërë ligjesh të tjera pjesë e sistemit juridik grek.