Gjykata Themelore në Prishtinë u ka vazhduar paraburgimin edhe për dy muaj tjerë tre të dyshuarve për sulmin terrorist në Banjskë të Zveçanit.
Lajmin për Telegrafin e konfirmoi zëdhënësja e Gjykatës, Mirlinda Gashi.
“Referuar kërkesës tuaj për informata, ju njoftojmë se pas kërkesës së Prokurorisë Speciale të Republikës së Kosovës për vazhdimin e masës së paraburgimit në çështjen penale kundër të pandehurve D.M, B.S dhe V.T, Gjykata Themelore në Prishtinë – Departamenti Special ka aprovuar kërkesën e PSRK-së dhe tre të pandehurve iu ka vazhduar masën e paraburgimit në kohëzgjatje prej dy muaj, për secilin”, tha Gashi për Telegrafin.
Masa e paraburgimit të pandehurve iu është vazhduar nga data 24.12.2023 deri me datë 24.02.2024.
Tre personat, Dushan Maksimoviq, Vladimir Toliq dhe Blagoje Spasojeviq, dyshohen për sulmin terrorist në veri të vendit, saktësisht në Banjskë të Zveçanit, ku u vra një polic dhe një tjetër mbeti i plagosur.
Ndryshe, tre të dyshuarit gjenden në paraburgim nga 26 shtatori.