Turqia kritikoi ashpër ministrin e Jashtëm izraelit, Israel Katz, duke e akuzuar atë për deklarata të mbushura me “mosrespekt, gënjeshtra dhe shpifje” për presidentin turk Recep Tayyip Erdoğan, raporton Anadolu.
Ministria e Jashtme e Turqisë dënoi qeverinë izraelite për politikat e saj “në përpjekje për të zgjatur kohën e saj në pushtet”, duke thënë se Izraeli po krijon dhunën dhe paqëndrueshmërinë në rajon.
MPJ-ja turke tha se qeveria izraelite duhet të ndalojë menjëherë mizoritë në Gaza dhe të dakordohet për një armëpushim të përhershëm, duke përsëritur angazhimin e Turqisë për të mbrojtur të drejtat palestineze.
Këto kritika të MPJ-së turke erdhën pas një postimi në mediat sociale nga ministri izraelit Katz që shënjestronte presidentin Erdoğan për qëndrimin e tij kundër bashkëpunimit të NATO-s me Izraelin.
Izraeli ka vrarë më shumë se 38.000 palestinezë që nga një sulm ndërkufitar i Hamasit më 7 tetor. Fushata ushtarake e ka kthyer pjesën më të madhe të enklavës me 2,3 milionë njerëz në gërmadha, duke lënë shumicën e civilëve të pastrehë dhe në rrezik nga uria.
Izraeli akuzohet gjithashtu për kryerje gjenocidi në enklavën e rrethuar palestineze dhe rasti gjyqësor është duke vazhduar në Gjykatën Ndërkombëtare të Drejtësisë në Hagë.
