Ushtria izraelite ka lëshuar urdhra të rinj evakuimi për banorët e disa zonave në pjesën qendrore dhe jugore të Rripit të Gazës, që më parë ishin klasifikuar si “zona të sigurta humanitare” nga ushtria, transmeton Anadolu.
Në një deklaratë, ushtria izraelite urdhëroi banorët e lagjeve në veri të Khan Younisit në jug të Gazës dhe të lagjeve në lindje të Deir al-Balahut në pjesën qendrore të Rripit të Gazës që të evakuojnë zonat.
Ajo pretendoi se grupi palestinez i rezistencës Hamas “operon” nga këto zona dhe se ato do të jenë “zona të rrezikshme luftarake”.
Izraeli, duke shkelur një rezolutë të Këshillit të Sigurimit të OKB-së që kërkon një armëpushim të menjëhershëm, ka vazhduar ofensivën e tij brutale në Gaza që nga një sulm tetorin e kaluar nga grupi i rezistencës palestineze Hamas.
Që atëherë, në ofensivën izraelite kundër Rripit të Gazës janë vrarë më shumë se 40.000 palestinezë.
Mbi 10 muaj nga fillimi i luftës izraelite, pjesë të mëdha të Gazës qëndrojnë në gërmadha, krahas një bllokade paralizuese të ushqimit, ujit të pastër dhe ilaçeve.
Izraeli akuzohet për gjenocid në Gjykatën Ndërkombëtare të Drejtësisë, e cila e ka urdhëruar atë të ndalojë menjëherë operacionin e tij ushtarak në qytetin jugor Rafah, ku më shumë se 1 milion palestinezë kishin kërkuar strehim nga lufta përpara se të pushtohej më 6 maj.
