Agjencia për Mbrojtjen e Mjedisit (AMM) ka kërkuar ndihmën e KFOR-it për të intervenuar në zjarret që kanë shpërthyer në Parkun Kombëtar “Sharri”.
Sipas njoftimit të lëshuar, përfaqësuesit e KFOR-it janë duke monitoruar situatën dhe analizuar mundësitë për ndërhyrje.
AMM raportoi se zjarri vazhdon të përhapet drejt fshatit turistik të Prevallës dhe ka prekur edhe zonën strikte të natyrës “Maja e Arnenit”.
Për të ndihmuar në shuarjen e zjarrit dhe parandalimin e përhapjes së tij, janë angazhuar mbi 20 zjarrfikës nga brigada e zjarrfikësve të Prizrenit, një ekip i Policisë së Kosovës nga stacioni i Prizrenit, si dhe disa vullnetarë.
Po ashtu, pjesëtarë të Forcës së Sigurisë së Kosovës (FSK) janë në terren për të vlerësuar situatën dhe për të ndërmarrë masa të nevojshme.
Drejtor i DAPK “Sharri”, z. Bajram Kafexholli, ka zhvilluar një takim me përfaqësuesit e KFOR-it gjatë paradites së sotme, duke kërkuar ndërhyrjen e mundshme me helikopterë për shuarjen e zjarrit.
KFOR-i ka theksuar se është duke monitoruar situatën dhe po shqyrton mundësitë për intervenim.
The post Zjarri i madh në Prevallë, kërkohet ndihma e KFOR-it first appeared on Radio Televizioni Iliria.
