Përsa u përket përgëzimeve me të cilat Allahu (xh.sh.) i ka përgëzuar të devotshmit në Kuran, ato janë njëzet e shtatë:
1 – Përgëzimi me nderime (keramete): “(Të tillë janë) ata që besojnë dhe që (i) frikësohen Allahut. Ata i pret lajmi i mirë në këtë jetë dhe në tjetrën.”
2 – Përgëzimi me ndihmë dhe përkrahje: “Vërtet, Allahu është me ata që e kanë frikë dhe që janë punëmirë (të devotshmit)”
3 – Përgëzimi me dije dhe urtësi: “Nëse i frikësoheni Allahut, Ai do t’ju japë aftësinë e të gjykuarit drejt”
4 – Përgëzimi me shlyerjen e mëkateve dhe lartësimin e shpërblimit të të devotshmit: “Atij që i frikësohet Allahut, Ai do t’ia shlyejë veprat e këqija dhe do t’ia rrisë shpërblimin”
5 – Përgëzimi me shtimin e shpërblimit: “Ai do t’ia rrisë shpërblimin”
6 – Përgëzimi me falje: “dhe frikësojuni Allahut! Vërtet, Allahu është Falës e Mëshirëplotë”
7 – Lehtësia dhe mbarësia në punë: “Atij që i frikësohet Allahut, Ai do t’ia lehtësojë çështjen”
8 – Rrugëdalja nga brengat dhe sprovat: “Atij që i frikësohet Allahut, Ai do t’i gjejë rrugëdalje (nga çdo vështirësi)”
9 – Rizk (furnizim) i bollshëm me siguri e rehati: “… dhe do t’i japë furnizim prej nga nuk e pret”
10 – Shpëtimi nga dënimi dhe ndëshkimi: “Pastaj do t’i shpëtojmë ata që kanë qenë të devotshëm”
11 – Arritja e asaj që dëshirohet: “Por Allahu do t’i shpëtojë ata që janë ruajtur me të mirat e bëra”; dhe: “Vërtet, për të devotshmit ka vend triumfi (Xheneti)”
12 – Suksesi, mbarësia dhe mbrojtja nga gjynahet: “… por mirësia është (cilësi) e atij që beson Allahun, Ditën e Fundit, engjëjt, Librin dhe profetët; e atij që me vullnet jep nga pasuria e vet për të afërmit, jetimët, të varfrit, udhëtarët e mbetur rrugës, lypësit dhe për lirimin e të robëruarve; e atij që fal namazin dhe e jep zeqatin; dhe e atyre që i plotësojnë premtimet, kur marrin përsipër diçka; e atyre që durojnë në kohë skamjeje, sëmundjeje dhe lufte. Këta janë besimtarët e vërtetë dhe këta janë ata që e kanë frikë Allahun”
13 – Dëshmia për vërtetësinë e tyre: “Këta janë besimtarët e vërtetë dhe këta janë ata që e kanë frikë Allahun”
14 – Përgëzimi me nderim dhe fisnikëri: “Më i nderuari prej jush tek Allahu është ai që i frikësohet më shumë Atij”
15 – Përgëzimi me dashuri: “Allahu, me të vërtetë, i do ata që janë të devotshëm”
16 – Suksesi dhe shpëtimi: “Kijeni frikë Allahun (bëhuni të devotshëm), në mënyrë që të shpëtoni”
17 – Arritja e afrisë dhe lidhjes me Zotin: “Tek Allahu nuk arrin as mishi, as gjaku i tyre, por arrin përkushtimi (devotshmëria) juaj.”
18 – Marrja e shpërblimit pas sprovës: “Atë që ruhet (nga gjynahet) dhe bëhet i durueshëm, Allahu e shpërblen, se Ai kurrë nuk ia humb shpërblimin punëmirëve”
19 – Pranimi i veprave të mira (sadakasë): “Padyshim Allahu pranon vetëm prej të devotshmëve”
20 – Pastërtia dhe dëlirësia e zemrës: “Kjo tregon përkushtimin e zemrës së tij”
21 – Përsosmëria e adhurimit (robërisë): “Kijeni frikë Allahun ashtu si i takon Atj”
22 – Xhenetet dhe burimet: “Padyshim, të devotshmit do të jenë në kopshte (Xhenete) dhe burime”
23 – Siguria nga fatkeqësitë: “Vërtet, të devotshmit do të jenë në vend të sigurt”
24 – Krenaria e të qenit mbi krijesat e tjera: “Por njerëzit që i frikësohen Allahut, do të jenë mbi ata në Ditën e Kijametit”
25 – Largimi i frikës dhe i pikëllimit nga ndëshkimi: “Ata që ruhen nga të këqijat dhe kryejnë vepra të mira, nuk do të frikësohen e as do të pikëllohen”.
26 – Bashkëshortet e përshtatshme: “Vërtet, për punëdrejtët (të devotshmit) është përgatitur e mira (Xheneti): kopshte dhe vreshta, vajza të reja, të së njëjtës moshë)”
27 – Afrimi në praninë Hyjnore, takimi dhe shikimi (i Zotit): “Vërtet, besimtarët e devotshëm do të jenë në kopshtet e Xhenetit, ku rrjedhin lumenj në kuvendin e së vërtetës (në Xhenet), tek një Sundues i Plotfuqishëm”
Autor: Fejruz Abadi
Përktheu: Rushit Musallari
By: ardhmëriaonline.com
