Ministria e Mbrojtjes e Azerbajxhanit ka njoftuar se 50 ushtarë të vendit ranë dëshmorë ditët e fundit në provokimet e Armenisë, transmeton Anadolu Agency (AA).
“Gjithsej 50 persona nga personeli ushtarak i Forcave të Armatosura ranë dëshmorë përderisa parandalonin provokimet në shkallë të gjerë”, tha ministria.
Azerbajxhani ditët e fundit ka akuzuar Armeninë për “provokime në shkallë të gjerë”, duke theksuar se sabotuesit vendosën mina dhe forcat armene kryen qëllime “intensive” mbi pozicionet e Azerbajxhanit.
Ministria azerbajxhanase tha se këto veprime nga forcat armene çuan në konfrontim.
Sot, një takim midis presidentit të Azerbajxhanit dhe komandantëve të forcave të armatosura theksoi se përgjegjësia për tensionin aktual i mbetet “drejtpërdrejt udhëheqjes politike të Armenisë”.
Sot, gjithashtu edhe kryeministri i Armenisë, Nikol Pashinyan, tha se 49 ushtarë armenë humbën jetën në shpërthimin e fundit në kufi me Azerbajxhanin.
Marrëdhëniet midis dy ish-republikave sovjetike, Armenisë dhe Azerbajxhanit, kanë qenë të tensionuara që nga viti 1991, kur ushtria armene pushtoi Karabakun, një territor i njohur ndërkombëtarisht si pjesë e Azerbajxhanit.
Në vjeshtën e vitit 2020, Azerbajxhani çliroi disa qytete dhe mbi 300 vendbanime dhe fshatra që u pushtuan nga Armenia, ndërsa luftimet përfunduan me një marrëveshje të ndërmjetësuar nga Rusia.
