Venezuela njoftoi arrestimin e gjashtë shtetasve të huaj për komplot të dyshuar për të vrarë presidentin Nicolas Maduro, transmeton Anadolu.
Ministri i Brendshëm Diosdado Cabello konfirmoi arrestimet në një konferencë shtypi në Karakas dhe tha se tre të dyshuarit nga SHBA, dy nga Spanja dhe një shtetas çek po planifikonin të vrisnin Maduron dhe të organizonin “akte terroriste” brenda vendit.
Cabello tha se 400 pushkë dhe pistoleta, që dyshohet të jenë dërguara nga SHBA-ja, u sekuestruan gjatë një operacioni të inteligjencës, të cilat ai tha se do të përdoreshin për të “shkaktuar dhunë” në Venezuelë.
Ai pretendoi se dy shtetasit spanjollë që u arrestuan ishin të lidhur me Qendrën Kombëtare të Inteligjencës të Spanjës (CNI).
Burimet e qeverisë spanjolle, megjithatë, mohuan që individët të kenë punuar për CNI-në, sipas mediave spanjolle.
Ambasada spanjolle në Karakas thuhet se i ka dërguar një notë zyrtare Ministrisë së Jashtme të Venezuelës, duke kërkuar konfirmimin e identitetit dhe kombësisë së të arrestuarve dhe sqarimin e akuzave kundër tyre.
Pas zgjedhjeve presidenciale në Venezuelë më 28 korrik, Spanja mbështeti liderin e opozitës Edmundo Gonzalez dhe i dha atij mbrojtje në Madrid, duke shkaktuar një krizë diplomatike.
Pas një vendimi nga parlamenti spanjoll për të njohur Gonzalezin si president të Venezuelës dhe përshkrimit të ministres së Mbrojtjes Margarita Robles për Maduron si “diktator”, ministri i Jashtëm i Venezuelës Yvan Gil tërhoqi ambasadorin e vendit në Madrid për konsultime.
Kryetari i parlamentit Jorge Rodriguez kërkoi gjithashtu që “të gjitha marrëdhëniet diplomatike, ekonomike dhe tregtare” me Spanjën të ndërpriten.
