Kancelari gjerman Friedrich Merz tha sot se paketa financiare e BE-së prej 90 miliardë eurosh (105 miliardë dollarë) për Ukrainën është tashmë në fuqi, duke e quajtur atë një mesazh të fortë politik për Moskën ndërsa blloku vazhdon të debatojë përdorimin e ardhshëm të aseteve të ngrira ruse, transmeton Anadolu.
“Paketa financiare për Ukrainën është në fuqi. Ukraina do të marrë kredi pa interes prej 90 miliardë eurosh, siç sugjerova unë”, tha Merz në platformën sociale të kompanisë amerikane X.
“Kjo dërgon sinjal të qartë nga Evropa për Putinin. Kjo luftë nuk do t’ia vlejë. Ne do t’i mbajmë asetet ruse të ngrira derisa Rusia të ketë kompensuar Ukrainën”, shtoi ai.
Komentet e kancelarit gjerman erdhën pasi udhëheqësit e BE-së ranë dakord në Këshillin Evropian, pas javësh negociatash intensive, për të financuar Ukrainën përmes huamarrjes në tregjet e kapitalit për vitet 2026 dhe 2027.
“Marrëveshja u arrit pasi shtetet anëtare dështuan të arrinin konsensus për përdorimin direkt të aseteve të ngrira ruse për të mbështetur Kievin”, tha presidentja e Komisionit Evropian, Ursula von der Leyen.
