Kancelari gjerman, Friedrich Merz nuk do të marrë pjesë në ceremoninë e nënshkrimit të iniciativës Bordi i Paqes të presidentit të SHBA-së, Donald Trump, tha sot një zëdhënës i qeverisë, transmeton Anadolu.
Merz do të largohet nga Forumi Ekonomik Botëror pas fjalimit të tij të së enjtes në mëngjes, njoftoi zëvendëszëdhënësi i qeverisë, Steffen Meyer në një konferencë për mediat në Berlin.
“Kancelari do të largohet nga Davosi menjëherë pas fjalimit të tij të së enjtes në mëngjes për të marrë pjesë në bisedimet paraprake në Bruksel. Kjo do të thotë që kancelari do të jetë larguar tashmë deri në kohën e ceremonisë”, tha ai.
Merz është planifikuar të marrë pjesë në samitin informal të udhëheqësve të BE-së në Bruksel për të diskutuar tensionet me SHBA-në për shkak të Grenlandës dhe kërcënimet e presidentit Trump për të vendosur tarifa për vendet që kundërshtojnë planin e tij për të marrë kontrollin e ishullit të pasur me minerale.
Trumpi ka pohuar vazhdimisht se SHBA-ja duhet të blejë Grenlandën për arsye sigurie kombëtare dhe për të penguar rivalët si Kina dhe Rusia në Arktik. Ai ka kërcënuar me tarifa aleatët evropianë që kundërshtojnë kontrollin e Grenlandës nga SHBA-ja dhe kanë dërguar një numër të vogël trupash në territor.
Si Danimarka ashtu edhe Grenlanda, një territor vetëqeverisës brenda Mbretërisë së Danimarkës, kanë hedhur poshtë çdo propozim për shitjen e territorit, duke riafirmuar sovranitetin danez mbi ishullin.
