Një studim i ri i Universitetit të Oxfordit ka rikthyer vëmendjen te rëndësia e kalciumit në ushqyerje, pasi ka treguar se një gotë e madhe qumësht në ditë mund të lidhet me rrezik më të ulët për kancer të zorrës së trashë.
Sipas studimit më të fundit, konsumimi i rregullt i qumështit dhe ushqimeve të tjera të pasura me kalcium mund të ketë efekt mbrojtës ndaj kancerit të zorrës së trashë.
Hulumtimi i Universitetit të Oxfordit është kryer mbi më shumë se 542.000 gra, të ndjekura mesatarisht për 16 vjet.
Shkencëtarët kanë zbuluar se 300 miligramë shtesë kalcium në ditë, që përputhen afërsisht me një gotë të madhe qumësht, lidhen me 17 për qind rrezik më të ulët për zhvillimin e kancerit të zorrës së trashë.
Studimi është publikuar në revistën Nature Communications dhe është financuar nga Cancer Research UK. Autorët theksojnë se efekti mbrojtës nuk lidhet domosdoshmërisht vetëm me qumështin e lopës, por me kalciumin në përgjithësi, i cili mund të merret edhe nga jogurti, tofu, perimet me gjethe të errëta ose pijet bimore të pasuruara me kalcium.
Mjekja e përgjithshme Rupa Parmar ka paralajmëruar se në praktikë po sheh gjithnjë e më shpesh pacientë që i largojnë produktet e qumështit pa arsye mjekësore të konfirmuar.
“Në ordinancë e shoh vazhdimisht. Shprehja intolerancë ndaj produkteve të qumështit përdoret shumë lehtë dhe shumë njerëz ia vendosin vetes këtë diagnozë. Kur bëjmë testet, shpesh del se në fakt nuk e kanë këtë gjendje”, tha ajo.
Ajo shtoi se shmangia e produkteve të qumështit është kthyer në trend.
“Heqja dorë nga produktet e qumështit është bërë trend, sepse njerëzit mendojnë se shëndoshin, por shpesh i bëjnë vetes më shumë dëm sesa dobi kur i shmangin”, tha Parmar.
Shkencëtarët supozojnë se kalciumi mund të lidhet me substanca të dëmshme në zorrë, përfshirë acidet biliare dhe acidet yndyrore, duke ulur kështu efektin e tyre potencialisht kancerogjen.
Rezultatet tregojnë se ushqimet e pasura me kalcium, veçanërisht qumështi dhe jogurti, kanë lidhjen më të qartë me rrezik më të ulët, ndërsa djathi dhe akullorja nuk kanë treguar të njëjtin efekt.
“Çelësi është kalciumi, dhe ai mund të vijë nga burime të ndryshme: qumështi, jogurti, por edhe tofu ose pijet bimore të pasuruara me kalcium”, tha Parmar.
Ekspertët theksojnë se kjo nuk do të thotë se qumështi është mbrojtje e sigurt ndaj sëmundjes, por një lidhje e vërejtur në një studim vëzhgues që duhet interpretuar në kontekstin e mënyrës së përgjithshme të jetesës.
Studimi ka gjetur gjithashtu se alkooli, mishi i kuq dhe mishi i përpunuar lidhen me rrezik më të lartë për kancer të zorrës së trashë. Çdo 20 gramë alkool në ditë lidhet me 15 për qind rritje të rrezikut, ndërsa çdo 30 gramë mish të kuq ose të përpunuar me 8 për qind rritje.
“Është e rëndësishme të kuptohet se faktorët e rrezikut janë pjesë e një tabloje më të gjerë. Përqendrimi në mënyrë të shëndetshme jetese, përfshirë ushqyerjen e balancuar dhe aktivitetin e rregullt fizik, është mënyra më e mirë për uljen e rrezikut nga çdo lloj kanceri”, tha Parmar.
Ajo shtoi se ndërprerja e duhanit dhe ulja e konsumit të alkoolit janë ndër hapat më të rëndësishëm në parandalimin e kancerit të zorrës së trashë.
Mjekët gjithashtu paralajmërojnë se duhet pasur kujdes ndaj shenjave si gjaku në jashtëqitje, humbja e pashpjegueshme e peshës, dhimbja e vazhdueshme në bark dhe ndryshimet e zgjatura në jashtëqitje.
Diagnoza e hershme, sipas ekspertëve, rrit ndjeshëm gjasat për trajtim të suksesshëm, ndaj rekomandohet që simptomat e pazakonshme të mos injorohen.
