Një raport pretendon se klubet e kolonive sioniste në Bregun Perëndimor po legjitimohen përmes strukturave zyrtare të futbollit ndërkombëtar
Një raport i organizatës Scottish Sport for Palestine ngre akuza të forta ndaj FIFA-s dhe UEFA-s, duke pretenduar se këto institucione po kontribuojnë në normalizimin e pranisë së vendbanimeve izraelite në territoret e pushtuara palestineze, veçanërisht në Bregun Perëndimor.
Sipas raportit, përmes lejimit të pjesëmarrjes së klubeve të këtyre vendbanimeve në sistemin zyrtar të futbollit izraelit dhe ndërkombëtar, federatat po ndihmojnë në legjitimimin e një realiteti që organizata e cilëson si shkelje të së drejtës ndërkombëtare.
Raporti, i titulluar “Beyond the green line. Israeli settlement clubs in Occupied Palestine”, argumenton se sporti, dhe veçanërisht futbolli, po përdoret si mjet politik për të konsoliduar kontrollin mbi territore të diskutueshme.
Sipas autorëve, kjo formë shërben për të përmirësuar imazhin e vendbanimeve dhe për t’i paraqitur ato si pjesë normale të jetës shoqërore dhe sportive, pavarësisht statusit të tyre të kontestuar juridik.
Sipas raportit, që nga viti 1967 Izraeli ka kontrolluar Bregun Perëndimor, Jerusalemin Lindor dhe Lartësitë e Golanit. Vendbanimet e krijuara në këto zona konsiderohen të paligjshme nga një sërë institucionesh ndërkombëtare, përfshirë OKB-në dhe Bashkimin Evropian, të cilat i lidhin me shkelje të Konventës së Katërt të Gjenevës.
Këto vendbanime përfshijnë banesa, infrastrukturë, rrugë dhe objekte rekreative, përfshirë fusha sportive. Sipas raportit, ato shërbejnë jo vetëm si vendbanime civile, por edhe si instrumente të zgjerimit territorial.
Sot përmenden rreth 160 vendbanime zyrtare dhe afro 200 avantposte në Bregun Perëndimor dhe Jerusalemin Lindor, të cilat vazhdojnë të zgjerohen me mbështetje politike dhe institucionale.
Raporti thekson se disa klube futbolli veprojnë brenda këtyre vendbanimeve dhe marrin pjesë në sistemin e ligave izraelite. Sipas tij, kjo kontribuon në normalizimin e situatës, duke krijuar perceptimin se vendbanimet janë pjesë e zakonshme e jetës sportive dhe shoqërore.
Në disa raste, toka e përdorur më parë nga palestinezët për bujqësi është shndërruar në fusha futbolli për kolonët. Kjo paraqitet si shembull i humbjes së aksesit të popullsisë lokale në territorin e saj.
Një pjesë qendrore e kritikës i drejtohet FIFA-s dhe UEFA-s. Sipas raportit, gjatë drejtimit të tyre nga Gianni Infantino-s dhe Aleksander Čeferin, klubet e vendbanimeve janë integruar më thellë në strukturat e futbollit, pa masa vendimtare për ndalimin e tyre.
Megjithëse janë bërë premtime për hetime, masat konkrete kanë qenë të kufizuara, duke përfshirë vetëm gjoba dhe deklarata që e përshkruajnë situatën juridike të Bregut Perëndimor si komplekse. Ndërkohë, klubet vazhdojnë të marrin pjesë në gara dhe të përfitojnë ekspozim ndërkombëtar.
Raporti pretendon gjithashtu se disa ndeshje transmetohen në platforma zyrtare, duke kontribuar në rritjen e vizibilitetit dhe normalizimit të tyre.
Në përfundim, raporti argumenton se përfshirja e këtyre klubeve në strukturat e futbollit kontribuon në konsolidimin e një realiteti të padrejtë dhe të kontestuar. Sipas autorëve, FIFA dhe UEFA nuk janë thjesht vëzhguese neutrale, por aktorë që, me veprim ose mosveprim, ndikojnë në legjitimimin e situatës në terren. tesheshi
