Të paktën tetë palestinezë janë vrarë në sulmet izraelite në pjesë të ndryshme të Rripit të Gazës, pavarësisht nismës së fundit të Shteteve të Bashkuara për zbatimin e armëpushimit dhe çarmatimin e Hamasit.
Sipas Mbrojtjes Civile në Gaza, një burrë dhe një grua humbën jetën pasi një helikopter izraelit goditi një apartament në jug të Deir el-Balah. Në sulme të tjera u vranë edhe tre persona në Khan Younis dhe një tjetër në Qytetin e Vjetër të Gazës.
Sulmet ndodhën vetëm dy ditë pasi presidenti amerikan Donald Trump publikoi një plan prej 15 pikash për zbatimin e marrëveshjes së armëpushimit të vitit të kaluar. Plani parashikon çarmatimin e Hamasit dhe tërheqjen e forcave izraelite, por deri tani nuk është zbatuar në terren.
Hamasi ka deklaruar se do t’i dorëzojë armët për ruajtje vetëm pasi Izraeli të ndalojë operacionet ushtarake dhe të tërheqë trupat në përputhje me marrëveshjen e armëpushimit. Nga ana tjetër, një zyrtar izraelit ka bërë të ditur se nuk do të ketë tërheqje nga pozicionet aktuale pa një çarmatim të plotë dhe të besueshëm të Hamasit.
Kryeministri izraelit Benjamin Netanyahu nuk ka komentuar publikisht planin amerikan. Ndërkohë, ministri i Sigurisë Kombëtare, Itamar Ben-Gvir, e ka kundërshtuar atë, duke kërkuar vazhdimin e operacioneve kundër drejtuesve të Hamasit.
Ish-zyrtari i lartë i Fatahut, Mohammed Dahlan, ka deklaruar se Jared Kushner, dhëndri i Donald Trumpit dhe një nga këshilltarët e nismës amerikane, i ka thënë se po punon me Izraelin për ndalimin e sulmeve në Gaza. Sipas Dahlanit, bisedimet me Uashingtonin vazhdojnë, ndërsa suksesi i marrëveshjes varet nga ndërprerja e plotë e sulmeve izraelite.
Ndërkohë, të shtunën, sulmet izraelite shkatërruan një depo të furnizimeve mjekësore në Gazën qendrore, duke lënë pas një krater të madh dhe duke shtuar dëmet në infrastrukturën civile, pavarësisht përpjekjeve diplomatike për arritjen e një armëpushimi të qëndrueshëm. /mesazhi
