Presidenti amerikan, Donald Trump, ka hedhur poshtë raportimet se Shtetet e Bashkuara po përballen me mungesë municionesh, duke insistuar se rezervat ushtarake mbeten të mjaftueshme. Ai njëkohësisht ka paralajmëruar masa të ashpra ndaj personave që dyshohen për rrjedhje të informacioneve të klasifikuara, ndërsa lufta me Iranin vazhdon dhe shqetësimet për gjendjen e arsenalit amerikan po shtohen.
Presidenti i Shteteve të Bashkuara, Donald Trump, ka mohuar raportimet se Ushtria amerikane po përballet me mungesë municionesh. Në një postim në rrjetin social Truth Social, ai deklaroi se SHBA-ja disponon rezerva të mëdha armësh dhe paralajmëroi se personat që dyshohen për rrjedhje të informacioneve të klasifikuara do të përballen me dënime të gjata me burg.
“SHBA-ja ka sasi të mëdha municionesh, veçanërisht të disa llojeve të caktuara. Për më tepër, po prodhohen dhe po dërgohen vazhdimisht sasi të reja sipas nevojës”, shkroi Trump.
Ndërkohë që lufta me Iranin ka hyrë në muajin e saj të gjashtë, Trumpi dhe Pentagoni po përballen me pyetje në rritje lidhur me gjendjen e rezervave ushtarake amerikane.
SHBA-ja dhe Irani kanë vazhduar të shkëmbejnë sulme, pavarësisht disa ndërprerjeve të përkohshme të luftimeve. Deri më tani, përpjekjet për një marrëveshje që do t’i jepte fund konfliktit nuk kanë sjellë rezultat.
Administrata amerikane ka këmbëngulur se rezervat e raketave mbeten të mjaftueshme, edhe pse ushtria ka përdorur një numër të madh armësh me saktësi të lartë gjatë operacionit ushtarak të njohur si “Operation Epic Fury”, si dhe në sulmet dhe kundërsulmet që pasuan.
Sipas televizionit amerikan CBS News, partner i BBC-së në SHBA, Ushtria amerikane ka konsumuar një pjesë të konsiderueshme të rezervave të raketave me rreze të gjatë veprimi. Ky raport bazohet në deklaratat e dy burimeve anonime që pretendojnë se kanë njohuri të drejtpërdrejta për situatën.
Nga ana tjetër, gazeta The Washington Post raportoi se Trumpi kishte zhvilluar javën e kaluar një bisedë të tensionuar me sekretarin e Mbrojtjes, Pete Hegseth, lidhur me mundësinë e mungesës së armëve. Edhe ky raport mbështetet në burime anonime, ndërsa BBC-ja nuk ka mundur ta konfirmojë në mënyrë të pavarur.
Në reagimin e tij, Trumpi i quajti rrjedhjet e informacionit “deklarata tradhtare” dhe paralajmëroi masa të ashpra.
Informacionet e sakta mbi rezervat e raketave amerikane janë të klasifikuara. Që nga marrja e detyrës, sekretari i Mbrojtjes, Pete Hegseth, ka vendosur masa më të rrepta për kufizimin e informacionit që gazetarët mund të marrin nga Pentagoni.
Megjithatë, analiza të bazuara në të dhëna publike tregojnë një tjetër panoramë. Sipas Qendrës për Studime Strategjike dhe Ndërkombëtare (CSIS), një institut kërkimor amerikan i specializuar në çështjet e sigurisë, mbrojtjes dhe politikës së jashtme, deri në fund të korrikut SHBA-ja kishte në dispozicion mes 759 dhe 827 raketa Patriot krahasuar me rreth 2.330 që kishte përpara fillimit të konfliktit.
Po i njëjti institut vlerëson se rreth 60% e raketave THAAD, të përdorura për të interceptuar sulmet ajrore dhe raketore, tashmë janë shpenzuar. Këtë e deklaroi Mark Cancian, kolonel i pensionuar i marinës dhe këshilltar i lartë në CSIS.
Përveç konfliktit me Iranin, SHBA-ja po përballet me kërkesa të mëdha për armatim edhe nga aleatët e saj. Washingtoni i ka furnizuar Ukrainës një numër të konsiderueshëm raketash Patriot që nga fillimi i pushtimit rus në vitin 2022. Megjithatë, me zvogëlimin e rezervave, ekspertët besojnë se Pentagoni do të jetë më i kujdesshëm në dërgimin e armëve të tjera.
Ekspertët theksojnë se prodhimi i armëve moderne kërkon kohë, pasi procesi i financimit, porositjes, prodhimit dhe dorëzimit mund të zgjasë me muaj ose vite. Për këtë arsye, rezervat nuk mund të zëvendësohen shpejt pasi konsumohen.
Muajin e kaluar, Trumpi deklaroi për The Wall Street Journal: “Ne kemi më shumë municione se çdo vend tjetër në botë, madje shumë më tepër sesa na nevojiten”.
Edhe sekretari i Mbrojtjes Pete Hegseth i ka cilësuar raportimet për mungesë municionesh si një “histori e fabrikuar”. Në një intervistë për CBS më 14 qershor, ai tha se rezervat amerikane janë të sigurta.
Megjithatë, administrata ka pranuar se po rrit ritmin e prodhimit të armëve. Muajin e kaluar, Hegseth i kërkoi Senatit amerikan miratimin e një fondi emergjent prej 87 miliardë dollarësh, i cili do të përdoret për pagesat e personelit ushtarak, si dhe për rimbushjen sa më të shpejtë të rezervave të pajisjeve dhe municioneve. /koha
