Organizata për Bashkëpunim Islamik (OBI) përshëndeti të premten nënshkrimin e Marrëveshjes së Përbashkët të Mbrojtjes së Mekës mes Arabisë Saudite, Türkiyes dhe Pakistanit.
Sekretari i Përgjithshëm i OBI-së, Hissein Brahim Taha, shprehu “vlerësimin dhe mbështetjen e fortë” për marrëveshjen, duke e cilësuar atë si një “hap të rëndësishëm strategjik” që pasqyron angazhimin e tri vendeve për forcimin e bashkëpunimit rajonal dhe ndërkombëtar, sipas një deklarate të organizatës.
Taha tha se marrëveshja përbën “një shtyllë themelore për mbështetjen e sigurisë dhe stabilitetit në rajon dhe në të gjithë botën myslimane”.
Ai shtoi se ajo mishëron një vendosmëri të përbashkët për t’iu përgjigjur sfidave në rritje të sigurisë dhe për të forcuar solidaritetin dhe partneritetet konstruktive mes shteteve anëtare të OBI-së.
Kreu i OBI-së lavdëroi gjithashtu përpjekjet dhe udhëheqjen e tri vendeve që çuan në nënshkrimin e asaj që ai e quajti “marrëveshje historike.”
Ai u shprehu optimist se marrëveshja do të kontribuojë në arritjen e paqes dhe prosperitetit në rajon dhe në komunitetin e gjerë ndërkombëtar.
Të premten, Türkiye, Arabia Saudite dhe Pakistani nënshkruan një marrëveshje të përbashkët mbrojtjeje në një samit trepalësh në Mekë, duke u zotuar të forcojnë sigurinë kolektive, të thellojnë bashkëpunimin në fushën e mbrojtjes dhe të promovojnë paqen dhe stabilitetin në rajon e më gjerë.
Marrëveshja e Përbashkët e Mbrojtjes së Mekës u nënshkrua nga Presidenti turk Recep Tayyip Erdoğan, Princi i Kurorës i Arabisë Saudite Mohammed bin Salman dhe Kryeministri pakistanez Shehbaz Sharif, gjatë samitit të mbajtur në Pallatin Al-Safa.
Sipas informacioneve të marra nga zyrtarë turq, marrëveshja është një marrëveshje bashkëpunimi me orientim mbrojtës, që nuk synon asnjë vend dhe është hartuar për të forcuar angazhimet ndaj paqes, stabilitetit dhe prosperitetit rajonal e global, përmes ndarjes së barrës dhe një qasjeje të përbashkët sigurie.
Marrëveshja synon të forcojë pengesën kolektive kundër çdo akti agresioni dhe parashikon se një sulm i armatosur ndaj cilitdo prej tri vendeve do të konsiderohet sulm ndaj të gjithëve, shtuan zyrtarët.
