Ekipet e Mbrojtjes Civile në Gaza kanë nxjerrë 19 trupa nga rrënojat e një ndërtese banimi të shkatërruar në qytetin e Gazës. Sipas autoriteteve, shumica e viktimave ishin gra dhe fëmijë.
Operacioni i kërkim-shpëtimit përfundoi të shtunën, pas katër ditësh punë në ndërtesën “Karam”, në pjesën perëndimore të qytetit të Gazës.
Mohammed Abu Dan, i cili drejton operacionet e kërkimit, tha se ekipet e specializuara do të zhvendosen në një tjetër zonë të qytetit për të vazhduar kërkimet për persona të tjerë nën rrënoja.
Operacionet po zhvillohen kryesisht me mjete të thjeshta dhe me punë manuale, për shkak të mungesës së makinerive të rënda që nevojiten për të larguar blloqet e betonit të shembura nga ndërtesat.
Ministria e Shëndetësisë në Gaza ka bërë të ditur se më shumë se 8,000 persona ende konsiderohen të zhdukur dhe besohet se ndodhen nën rrënoja në zona të ndryshme të Rripit të Gazës.
Sipas të dhënave të fundit të ministrisë, që nga hyrja në fuqi e armëpushimit më 11 tetor të vitit të kaluar, të paktën 1,254 persona janë vrarë, 4,121 janë plagosur, ndërsa 804 trupa janë nxjerrë nga rrënojat.
Në total, që nga tetori i vitit 2023, numri i të vrarëve në Gaza ka kaluar 73,300, ndërsa më shumë se 174,000 persona janë plagosur.
Operacioni i fundit i kërkimit vjen disa ditë pas një ceremonie masive mortore në qytetin e Gazës, ku u varrosën 112 persona nga familjet Abu Sharia dhe al-Hasayna. Mbetjet e tyre u nxorën nga rrënojat e një blloku banimi në lagjen Sabra, i cili ishte shkatërruar nga një sulm izraelit në nëntor të vitit 2023. /mesazhi
