Akuza të rënda për Infantinon, në shënjestër të shumë zërave që pas Botërorit
UEFA i ka paguar një shumë gjashtëshifrore një ish-punonjëseje i cili dyshohet se ka pasur një aferë me Gianni Infantinon ndërsa ai ishte sekretar i përgjithshëm i organit drejtues të futbollit evropian, raportoi gazeta britanike The Telegraph.
Sipas burimeve të konsultuara nga The Telegraph, gruaja u ngjit në një pozicion drejtues më të paguar gjatë aferës së saj të dyshuar me Infantinon. Pasi u largua nga UEFA, organizata dyshohet se pagoi edhe për MBA-në e saj në një shkollë biznesi, me tarifa vjetore shkollimi prej rreth 45,000 paund.
UEFA konfirmoi të premten në mbrëmje se ish-punonjëses i ishin paguar paratë, si dhe kostot e programit MBA. Megjithatë, organizata theksoi se pagesa ishte në përputhje me rregullat në fuqi në atë kohë për punonjësit që largoheshin nga UEFA.
“Ne jemi të vetëdijshëm për akuzat dhe mund të konfirmojmë se individit në fjalë iu pagua një shumë në largim, përveç mbulimit të kostove të një programi MBA në një shkollë lokale biznesi,” tha UEFA.
Organizata tha gjithashtu se rregullat ishin shtrënguar dhe modernizuar që nga viti 2016 dhe se rregullat aktuale vlejnë për të gjithë punonjësit, pavarësisht nga pozicioni i tyre.
Burimet e Telegraph pohojnë se gruaja punonte në një pozicion administrativ në kohën e aferës së dyshuar dhe më vonë u ngrit në detyrë në një pozicion drejtues. Paga e saj thuhet se u rrit me 30 përqind, në rreth 160,000 franga zvicerane në vit, ose afërsisht 147,000 paund.
Rritja e saj e shpejtë, thuhet se ka ngritur pyetje midis kolegëve dhe shqetësime se Infantino mund të jetë duke përdorur pozicionin e tij për të lehtësuar avancimin e saj.
Sipas burimeve të gazetës britanike, presidenti i atëhershëm i UEFA-s, Michel Platini, dyshohet se e ka përballur Infantinon në lidhje me këtë aferë, pas së cilës u ra dakord që gruaja të largohej nga organizata në këmbim të një zgjidhjeje financiare.
The Telegraph gjithashtu pretendon se Infantino, pas largimit të saj nga UEFA, përdori kontaktet e tij për ta ndihmuar atë të merrte një pozicion të ri, të paguar mirë në të njëjtën fushë.
Por FIFA i ka mohuar fuqimisht akuzat.
Një zëdhënës i FIFA-s tha se Gianni Infantino “i mohon fuqimisht këto akuza” dhe se ato janë “kategorikisht të rreme”.
Ai shtoi se nuk kishte pasur kurrë ankesa nga punonjësit e UEFA-s ose FIFA-s në lidhje me sjelljen e Infantinos dhe se të gjitha vendimet që lidhen me punonjësit, përfshirë largimet dhe pagesat e ndërprerjes së punës, ishin miratuar gjithmonë nga drejtorët përkatës në përputhje me rregulloret në fuqi në atë kohë.
Infantino ka qenë në krye të FIFA-s që nga viti 2016, pasi më parë kishte punuar për UEFA-n për 16 vjet.
Gazeta Telegraph raporton se Infantino është i martuar me Leena Al Ashqar, me të cilën ka katër vajza.
UEFA ka konfirmuar pagesën dhe financimin e studimeve MBA, por pretendon se pagesat ishin në përputhje me rregullat e asaj kohe. Nga ana tjetër, Infantino i ka mohuar fuqimisht akuzat për sjellje të pahijshme. /tesheshi
