Kryeministrja e Italisë, Giorgia Meloni tha sot se kriza e migracionit në enklavën e Afrikës Veriore të Spanjës, Ceuta, tregon nevojën që Evropa të mbrojë kufijtë e saj të jashtëm, transmeton Anadolu.
“Shumica dërmuese e vendeve evropiane ndajnë pozicionin që Italia ka shprehur ditët e fundit: se përparësia e Evropës është të mbrojë kufijtë e saj të jashtëm nga imigracioni i pakontrolluar, të përjashtojë çdo rrezik sigurie dhe terrorizmi dhe të mbrojë lirinë e lëvizjes që është themeli i sistemit Shengen”, i tha ajo gazetës financiare italiane “Milano Finanza”.
Meloni tha se “kriza serioze e migracionit” në Ceuta dhe mundësia e një fluksi tjetër të shtunën kërkon që Italia të mbetet “jashtëzakonisht vigjilente” dhe të marrë të gjitha masat e nevojshme.
Italia kohët e fundit vendosi kontrolle të përkohshme kufitare ajrore dhe detare me Spanjën pas mbërritjes së më shumë se 70 mijë emigrantëve në Ceuta në fund të korrikut.
Madridi ka kritikuar masën italiane, duke vënë në dukje se Ceuta është jashtë zonës Shengen, që do të thotë se emigrantët që mbërrijnë atje nuk mund të udhëtojnë lirshëm për në vendet e tjera evropiane. Ai akuzoi Romën për përdorimin e çështjes për qëllime politike të brendshme.
Spanja, nga ana tjetër, vendosi kontrolle të ngjashme kufitare për udhëtarët nga Italia.
