Tre persona u vranë dhe të paktën dy të tjerë u plagosën nga sulmet ruse dhe ukrainase gjatë natës, sipas zyrtarëve nga të dyja palët të martën, transmeton Anadolu.
Shërbimi Shtetëror i Rojës Kufitare të Ukrainës tha se një sulm me dron rus dëmtoi infrastrukturën e pikës kufitare ndërkombëtare automobilistike Vinogradovka në Odesa, në kufi me Moldavinë, duke shkaktuar pezullimin e funksionimit të saj.
“Pala moldave është njoftuar për këtë”, tha shërbimi, duke shtuar se ekipet e emergjencës kishin shuar zjarrin.
Në qytetin e dytë më të madh të Ukrainës, Kharkiv, një person u vra kur raketat ruse goditën zonën industriale të distriktit Osnovyanskyi, tha kryebashkiaku Ihor Terekhov në Telegram.
Në Kiev, mbetjet e një droni dëmtuan një ndërtesë banimi 16-katëshe, por nuk u raportua për zjarr, tha kryebashkiaku Vitali Klitschko në Telegram.
Në rajonin Krasnodar të Rusisë, mbetjet e dronëve ukrainas ranë në stacionin hekurudhor Afipskaya, duke vrarë dy persona dhe plagosur dy të tjerë, tha guvernatori rajonal Veniamin Kondratyev në Telegram.
Ai tha se sulmi ukrainas shkaktoi gjithashtu zjarr në një rafineri nafte dhe dëmtoi 10 shtëpi private.
“Zjarrfikësit dhe shërbimet e emergjencës po punojnë aktualisht në vendngjarje”, tha ai.
Verifikimi i pavarur i pretendimeve të të dyja palëve mbetet i vështirë për shkak të luftës në vazhdim.
