Forcat e rreshtuara me qeverinë jemenase thanë të martën në mbrëmje se 14 pjesëtarë të grupit Huthi u vranë në sulme që shënjestruan pozicionet e grupit në jug të qytetit port të Detit të Kuq, Hodeidah, transmeton Anadolu.
Në një deklaratë të publikuar nga zyra e medias e Forcave të Rezistencës Kombëtare, të rreshtuara me qeverinë, thuhet se forcat kanë kryer sulme ndaj pozicioneve të Huthive që “goditën me saktësi objektivat e tyre”.
Huthit nuk reaguan menjëherë ndaj këtyre pretendimeve.
Më herët të martën, Këshilli Presidencial i Lidershipit i Jemenit miratoi masa të mëtejshme “parandaluese” ndaj Huthive, duke u zotuar të vazhdojë përpjekjet për rivendosjen e institucioneve shtetërore dhe për t’i dhënë fund kontrollit të grupit mbi pjesë të Jemenit.
Vendimi u mor në një mbledhje të këshillit në kryeqytetin saudit Riad, ku morën pjesë të gjithë anëtarët e tij, sipas agjencisë shtetërore të lajmeve të Jemenit, Saba.
Në mbledhje u diskutua për “zhvillimet në situatën ushtarake, të sigurisë dhe ekonomike, si dhe opsionet strategjike të shtetit për përballimin e përshkallëzimit të vazhdueshëm nga milicitë Huthi, në kuadër të përpjekjeve për rivendosjen e institucioneve shtetërore dhe përfundimin e grushtit të shtetit”.
“Shteti po vazhdon përpjekjet për të rivendosur institucionet e tij, për të vendosur autoritetin mbi gjithë territorin e tij kombëtar dhe për t’i dhënë fund vuajtjeve humanitare të shkaktuara nga milicitë terroriste Huthi, të mbështetura nga Irani”, shtoi këshilli.
Që nga viti 2022, Jemeni kishte përjetuar një qetësi relative pas viteve të luftës mes forcave qeveritare dhe Huthive, të cilët morën kontrollin e pjesës më të madhe të vendit, përfshirë kryeqytetin Sana, në vitin 2014.
Në fillim të muajit të kaluar, luftimet mes forcave qeveritare dhe Huthive rifilluan në disa pjesë të Jemenit, përfshirë Maribin në Jemenin qendror, Al-Xhaufin në veri, si dhe Al-Dhalen dhe Taizin në jugperëndim.
Një koalicion i udhëhequr nga Arabia Saudite mbështet qeverinë e Jemenit me seli në Aden dhe forcat e saj të armatosura, ndërsa Irani akuzohet se mbështet Huthit, të cilët në korrik njoftuan një bllokadë detare ndaj Arabisë Saudite.
Që kur Izraeli nisi luftën në Rripin e Gazës në fund të vitit 2023, Huthit janë përfshirë gjithnjë e më shumë në armiqësitë rajonale, duke kryer sulme ndaj Izraelit dhe anijeve të lidhura me Izraelin në Detin e Kuq.
