Japonia rikonfirmoi të hënën mbështetjen e saj për presidenten e Gjykatës Penale Ndërkombëtare (GJPN), Tomoko Akane, pasi organizatat për të drejtat e njeriut kritikuan Tokyo-n për atë që e cilësuan si reagim të dobët ndaj sanksioneve amerikane kundër gjyqtares japoneze, transmeton Anadolu
Sekretari i Përgjithshëm i Kabinetit, Minoru Kihara, tha se Tokyo kishte mbajtur komunikim të ngushtë me Akane dhe ishte e gatshme të ofronte çdo mbështetje të nevojshme.
“Nëse ka ndonjë mbështetje të nevojshme që mund të ofrojmë, synojmë të sigurohemi që ta bëjmë këtë”, tha Kihara, sipas Kyodo.
Deklaratat erdhën pas kritikave nga organizatat ndërkombëtare për të drejtat e njeriut, pasi kryeministrja Sanae Takaichi dhe Ministria e Jashtme javën e kaluar i përshkruan sanksionet e Washington-it si “shumë për të ardhur keq”, por nuk e dënuan masën.
Sekretarja e Përgjithshme e Amnesty International, Agnes Callamard, kritikoi reagimin e Tokyo-s në platformën amerikane të rrjeteve sociale X.
“Ky është një reagim mjaft i dobët nga Japonia ndaj sanksionimit të shtetases së saj dhe presidentes së GJPN-së. Ata ‘e marrin në dijeni’ sanksionin dhe rikonfirmojnë angazhimin e tyre ndaj GJPN-së”, tha ajo.
Drejtoresha e Human Rights Watch Japan, Kanae Doi, tha gjithashtu se qeveria duhet të mbështetet në përkrahjen e saj të kahershme për GJPN-në, duke “dënuar fuqishëm” veprimet e administratës Trump kundër gjykatës.
Kihara pranoi se ishin ngritur “pikëpamje të ndryshme”, por nuk pranoi t’u përgjigjej atyre veçmas, duke rikonfirmuar mbështetjen e kahershme të Japonisë për GJPN-në dhe sundimin e së drejtës ndërkombëtare.
Washingtoni vendosi javën e kaluar sanksione ndaj Akane dhe prokurorit të GJPN-së, Abdoulaye Seye. Seye ishte përfshirë në kërkesën për lëshimin e një urdhërarresti ndaj kryeministrit izraelit, Benjamin Netanyahu për krime të dyshuara lufte në Gaza.
