Mesazhe që shkojnë përtej një shteti gjenocidal e ku përfshihet dhe Shqipëria
Presidenti turk Rexhep Tajip Erdogan i përcolli një tjetër mesazh Izraelit, pa e përmendur me emër, këtij shteti gjenocidal dhe atyre që qëndrojnë pas tij, duke u kujtuar se, “Shekulli i Turqisë ka filluar”.
Duke folur para ushtarëve selxhukë të veshur me uniforma – në provincën juglindore të Bitlisit – si pjesë e ngjarjeve për 955-vjetorin e Betejës së Manzikertit, presidenti turk foli për fillimin e një epoke të re të “Turqisë së madhe dhe të fuqishme”, ndërsa argumentoi se Siria, Iraku dhe rajoni më i gjerë në tërësi mund të çohen në një periudhë paqeje dhe stabiliteti.
“Siria dhe Iraku, por edhe rajoni ynë më i gjerë, do të fitojnë klimën e paqes dhe stabilitetit që kanë dëshiruar prej vitesh”, tha Erdogan, duke argumentuar se “të gjithë popujt vëllazërorë të rajonit tonë” do të përfitojnë nga ky zhvillim.
Presidenti turk sulmoi gjithashtu ata që, siç tha ai, po përpiqen të pengojnë përparimin e Turqisë dhe bashkëpunimin midis turqve, kurdëve dhe arabëve.
“Ne e dimë se kush shqetësohet nga kjo. Ne e dimë se kush është i shqetësuar. Atyre u them: pavarësisht se çfarë bëni, nuk mund të na largoni nga rruga jonë”.
Erdogani tha gjithashtu se Ankaraja i di “shumë mirë” llogaritë dhe planet që, siç tha ai, janë duke u zhvilluar në rajon, duke folur për “duar të ndyra” që drejtohen kundër Turqisë, popullit të saj dhe paqes në rajon.
Dhe këtu duhet të kujtojmë se në këto plane është dhe shteti bektashi që synohet të realizohet në Shqipëri, si një “levë izraelite” pas shpinës së Turqisë.
Me tone veçanërisht të larta, presidenti turk deklaroi se “tregtarët e gjakut, oportunistët që përfitojnë nga terrorizmi, njerëzit gjenocidalë që duan ta zhytin rajonin tonë në paqëndrueshmëri do të mposhten”.
Erdogan e përfundoi fjalimin e tij me një referencë të qartë për vizionin e tij për rolin e Turqisë, duke theksuar se “ana e njerëzimit do të jetë fituese”, ndërsa, siç tha ai, vëllazëria, paqja dhe stabiliteti do të mbizotërojnë.
“Fituesi do të jetë populli turk, me 86 milionë qytetarët e tij. Epoka e një Turqie të madhe dhe të fuqishme ka filluar. Shekulli i Turqisë ka filluar”, theksoi ai. /tesheshi
