Ministri i Jashtëm iranian, Abbas Araghchi zhvilloi biseda të ndara telefonike me shefin e Ushtrisë së Pakistanit, Asim Munir, dhe ministrin e Jashtëm të Katarit, Mohammed bin Abdulrahman Al Thani, për të diskutuar përpjekjet për uljen e tensioneve në rajon, transmeton Anadolu.
Gjatë bisedës me Munirin, ata theksuan nevojën për vazhdimin e konsultimeve dhe përpjekjeve të përbashkëta për promovimin e paqes dhe sigurisë në rajon, tha ministria në një deklaratë.
Araghchi diskutoi gjithashtu me Al Thanin rëndësinë e përdorimit të kanaleve diplomatike dhe ruajtjes së koordinimit për të parandaluar përshkallëzimin e mëtejshëm në rajon, shtoi ajo.
Ministria e Jashtme e Katarit tha se Al Thani dhe Araghchi diskutuan gjithashtu zhvillimet e fundit në rajon, veçanërisht bisedimet e vazhdueshme mes Omanit dhe Iranit për krijimin e një korridori të përkohshëm të përbashkët për transportin detar përmes Ngushticës së Hormuzit dhe një projekti të përbashkët për çminimin e rrugës ujore.
Më herët të martën, Omani dhe Irani njoftuan një kornizë të propozuar për krijimin e një korridori të përkohshëm të përbashkët për transportin detar përmes Ngushticës së Hormuzit dhe realizimin e një projekti të përbashkët për çminimin e rrugës ujore.
Kjo u njoftua në një deklaratë të përbashkët të lëshuar pas një takimi në Teheran mes ministrit të Jashtëm të Omanit, Badr Albusaidi, dhe Araghchit, sipas Ministrisë së Jashtme të Omanit.
Washingtoni e konsideron ngushticën një rrugë ujore ndërkombëtare që duhet të mbetet e hapur për lundrim të lirë dhe kundërshton vendosjen e tarifave për anijet ose marrëveshjet që do t’i jepnin Iranit një rol zyrtar në menaxhimin e trafikut detar.
Në mesin e qershorit, SHBA-ja dhe Irani, me ndërmjetësimin e Pakistanit dhe Katarit, nënshkruan një memorandum mirëkuptimi, por zbatimi i marrëveshjes përfundimisht ngeci për shkak të mosmarrëveshjeve lidhur me Ngushticën e Hormuzit.
Muajin e kaluar, SHBA-ja rifilloi sulmet e saj ushtarake ndaj Iranit, ndërsa Teherani u kundërpërgjigj duke goditur asetet ushtarake amerikane në një numër shtetesh arabe që janë në linjë me Washingtonin.
