Kryeministri i Nepalit, Balendra Shah, theksoi të martën rreziqet në rritje nga ndryshimet klimatike, ndërsa vazhdonin operacionet e kërkim-shpëtimit pas përmbytjeve shkatërruese që goditën vendin javën e kaluar, transmeton Anadolu.
Në një postim në Facebook, Shah tha se përmbytjet ishin një nga katastrofat më të mëdha në rajon dhe u shkaktuan nga një ortek dëbore dhe shkëmbinjsh në Himalaje.
“Ngjarja tregon se rreziqet me të cilat përballemi në rajonin e Himalajeve po rriten krahas ndryshimeve klimatike”, tha ai, duke bërë thirrje për vigjilencë.
Shah tha gjithashtu se Nepalit i duhet ta ngrejë fuqishëm në komunitetin ndërkombëtar çështjen e fatkeqësive të shkaktuara nga ndryshimet klimatike.
Ndërkohë, ekipet e shpëtimit vazhduan të kërkojnë trupa dhe persona të zhdukur në lumenj dhe tunele të projekteve hidroenergjetike.
Sipas të dhënave zyrtare, numri i të vdekurve nga përmbytjet dhe rrëshqitjet e dheut në Himalaje kaloi 1.019, një javë pas katastrofës në zonën kufitare mes Nepalit dhe Kinës.
Rreth 4.462 persona, përfshirë 844 shtetas të huaj, rezultojnë ende të zhdukur.
Në anën e Nepalit janë konfirmuar 1.003 të vdekur dhe 3.916 të zhdukur, ndërsa autoritetet kineze kanë konfirmuar 16 të vdekur dhe 546 të zhdukur.
