Kryeministri i Malajzisë, Anwar Ibrahim, bëri thirrje të mërkurën për përmbajtje dhe dialog pas interceptimit të një droni pranë qytetit saudit të Mekës, duke paralajmëruar kundër përshkallëzimit të mëtejshëm rajonal, transmeton Anadolu.
“I shoh me shqetësim të madh raportet se një dron u kap pranë Mekës al-Mukarramah”, tha Ibrahim në një deklaratë të postuar në platformën amerikane të mediave sociale X.
“Çdo përpjekje për të kërcënuar sigurinë dhe shenjtërinë e qytetit më të shenjtë të Islamit do të ishte tërësisht e papranueshme”, tha ai.
Anwar shprehu “mirënjohjen e thellë” të Malajzisë për veprimin e shpejtë të ndërmarrë nga Arabia Saudite për të mbrojtur banorët dhe pelegrinët në Mekë.
Ai tha se incidenti nxori në pah nevojën për të parandaluar përshkallëzimin e mëtejshëm në rajon dhe bëri thirrje për një ndalim të menjëhershëm të sulmeve ndaj vendeve civile dhe veprimeve që mund të rrezikojnë vendet e shenjta.
“Ne i nxisim palët përkatëse të ushtrojnë përmbajtje dhe të ndjekin një zgjidhje paqësore përmes dialogut pa vonesë”, shtoi kryeministri i Malajzisë.
Mbrojtja ajrore saudite ka interceptuar dhe shkatërruar një dron të lëshuar nga grupi Huthi i Jemenit pranë Mekës, tha koalicioni i udhëhequr nga Arabia Saudite herët të mërkurën, ndërsa rebelët Huthi mohuan përgjegjësinë për lëshimin.
Zëdhënësi i koalicionit, Turki al-Malki, tha se droni u interceptua rreth orës 18:50 sipas orës lokale të martën, përpara se të hynte në hapësirën ajrore të kufizuar, ndërsa mbetjet e tij ranë në jug të qytetit.
