Armëpushimi në Gaza nuk ka arritur të sigurojë stabilitet apo ndihmë të mjaftueshme humanitare, paralajmëroi të martën Sekretari i Përgjithshëm i OKB-së, Antonio Guterres, duke u bërë thirrje të gjitha palëve të përmbushin plotësisht detyrimet e tyre për të arritur paqe të qëndrueshme, transmeton Anadolu.
“Armëpushimi i vitit të kaluar solli njëfarë lehtësimi. Por ende nuk ka sjellë siguri, ndihmë të mjaftueshme humanitare apo një rrugë të besueshme drejt rimëkëmbjes dhe paqes”, tha Guterres në një deklaratë me rastin e trevjetorit të përshkallëzimit të konfliktit.
Shefi i OKB-së u bëri thirrje të gjitha palëve të kalojnë në fazat e mëtejshme të armëpushimit, bazuar në Planin Gjithëpërfshirës për Përfundimin e Konfliktit në Gaza, duke theksuar: “Është koha që armëpushimi të bëhet i përhershëm. Është koha që ndihma humanitare të lejohet në përmasa të mëdha. Dhe është koha që të respektohet e drejta ndërkombëtare”.
Duke folur për zanafillën e konfliktit, Guterres dënoi sulmet e 7 tetorit 2023, duke theksuar se grupet e armatosura palestineze vranë më shumë se 1.200 persona në Izrael dhe morën peng 251 persona.
Guterres theksoi se operacionet ushtarake që pasuan kanë shkaktuar “vuajtje të pallogaritshme” për palestinezët në Gaza përmes vdekjeve, zhvendosjes dhe shkatërrimit katastrofik në shkallë të gjerë.
Duke bërë thirrje për t’i dhënë fund menjëherë vuajtjeve të civilëve në Gaza, Guterres përsëriti se komuniteti ndërkombëtar duhet të krijojë një rrugë politike të besueshme që do t’u mundësojë izraelitëve dhe palestinezëve të jetojnë krah për krah me të drejta dhe dinjitet të barabartë.
Që nga tetori 2023, lufta e Izraelit në Gaza ka vrarë më shumë se 74 mijë palestinezë dhe ka plagosur mbi 175 mijë të tjerë, sipas të dhënave palestineze, ndërsa rreth 90 për qind e infrastrukturës së enklavës është shkatërruar.
Ushtria izraelite ka vrarë 1.454 palestinezë dhe ka plagosur 5.090 të tjerë që nga hyrja në fuqi e armëpushimit më 10 tetor 2025, sipas Ministrisë së Shëndetësisë në Gaza.
