Bombat iu drejtuan kryeministrit, ambasadorit ukrainas të Spanjës, kompanisë së armëve, qendrës satelitore të BE-së dhe Ministrisë së Mbrojtjes.
Një tjetër letër-bombë drejtuar Qendrës Satelitore të BE-së në Madrid u zbulua të enjten (1 dhjetor) në mëngjes, vetëm një ditë pasi një paketë e ngjashme shpërtheu në Ambasadën e Ukrainës në Madrid.
Sipas Ministrisë së Brendshme, policia spanjolle zbuloi gjithashtu një letër bombë të ngjashme drejtuar kryeministrit Pedro Sanchez të enjten (24 nëntor) e kaluar.
Në total, pesë letra-bomba u dërguan në objektiva të profilit të lartë në Spanjë gjatë javës së kaluar.
E para, drejtuar Sanchezit që përmbante lëndë shpërthyese, u dërgua me postë të zakonshme dhe u çaktivizua nga policia.
Të njëjtën ditë, Ministria e Brendshme i tha policisë që të rriste sigurinë rreth paketave të postës që dërgoheshin në zyrat e qeverisë, megjithëse kjo u bë publike vetëm një javë më vonë.
Të mërkurën, një paketë e ngjashme drejtuar ambasadorit ukrainas shpërtheu në ambasadën e Ukrainës në Madrid. Një punonjës ka pësuar lëndime të lehta.
Më vonë atë natë, kompania e armëve ‘Instalaza’, e cila prodhon granatahedhës me raketa C90 që Spanja dërgon në Ukrainë, zbuloi një tjetër pako të dyshimtë. Stafi e raportoi në polici dhe bomba u çaktivizua.
Vetëm pak orë më vonë, herët në mëngjesin e së enjtes, siguria në bazën ajrore Torrejon në Madrid zbuloi një tjetër zarf të dyshuar drejtuar Qendrës Satelitore të Bashkimit Evropian. Pasi e kaluan atë përmes një aparati me rreze X, autoritetet panë se ai përmbante “një mekanizëm”, sipas ministrit të brendshëm.
Për pasojë, policia u thirr për të çaktivizuar lëndën plasëse.
Gjithashtu, një tjetër zarf u zbulua të enjten në Ministrinë e Mbrojtjes në Madrid, i cili i drejtohej ministres së Mbrojtjes Margarita Robles, sipas burimeve që folën për agjencinë spanjolle të lajmeve EFE.
Edhe pse policia është ende duke hetuar, Ministri i Brendshëm Fernando Grande Marlaska tha se të katër letrat-bomba, duke përjashtuar atë që i drejtohej Ministrisë së Mbrojtjes, siç u njoh më vonë, kishin “karakteristika të ngjashme”.
Drejtori i përgjithshëm i Gardës Civile, Rafael Perez, tha më vonë se pesë zarfet kishin “karakteristika të ngjashme” dhe ishin dërguar nga brenda Spanjës, duke përmendur hetimet paraprake.
Ministria e Brendshme ka shtuar masat e sigurisë rreth konsullatave e organizatave të tjera të ndjeshme dhe Gjykata e Lartë tani po heton rastet.
Security guard at Ukraine’s embassy in Madrid is lightly injured while opening letter bomb addressed to Ukrainian ambassador, prompting Kiev to boost security at its embassies pic.twitter.com/QAP5tPi1pu
— TRT World Now (@TRTWorldNow) November 30, 2022
