Kryeministri i Kosovës, Albin Kurti ka mbajtur sot konferencë për media së bashku me ministren e Ekonomisë, Artane Rizvanolli.
Pas deklaratave për situatën me energjinë elektrike, Kurti i është përgjigjur edhe pyetjeve të gazetarëve.
I pyetur për gjendjen në veri dhe planin e Qeverisë së Kosovës për barrikadat, të cilat nuk janë larguar ende nga KFOR-i, Kurti ka thënë se sot janë bërë dy javë që po pengohet liria e lëvizjes.
“E para është që KFOR-i ka kërkuar pak kohë prej neve, ne i kemi dhënë pak kohë, por jemi dëshmitarë që tashmë janë bërë 2 javë. Sot janë bërë 2 javë që janë vendosur barrikada që po pengojnë lirinë e lëvizjes. KFOR-i gjithmonë ka qenë i përkushtuar për të ofruar ambient të sigurtë dhe liri të lëvizjes. Pra, ne u kemi dhënë kohë KFOR-it pasi që e kemi ditur misionin e tyre, për të siguruar lirinë e lëvizjes. Tash nuk kemi liri të lëvizjes, pasi që kemi 12 barrikada”, ka deklaruar Kurti.
Ai ka thënë se menjëherë pas Krishtlindjeve do të mbajë një takim me Komandantin e KFOR-it në Kosovë.
“Sot janë Krishtlindjet, por shumë shpejtë pas Krishtlindjeve ne do të kemi një takim me Komandantin e KFOR-it, pra unë si kryeministër në mënyrë që të gjejmë një zgjidhje. Kjo nuk mund të tolerohet pafundësisht”, ka deklaruar Kurti.