Kryeministri i vendit, Albin Kurti, ka pritur sot në takim të Dërguarin Special të Bashkimit Evropian për dialogun Kosovë-Serbi, Miroslav Lajçak.
Kurti bashkë me zv/kryeministri Besnik Bislimi kanë drekuar me Lajçakun në Prishtinë.
E pas kësaj, Kurti ka deklaruar se Kosova e pranon propozimin e Bashkimit Evropian për normalizimin e marrëdhënieve me Serbinë si dhe e konsideron atë si një bazë të mirë për diskutime të mëtejshme dhe një platformë solide për të ecur përpara, transmeton lajmi.net.
Megjithatë, Kurti tha se në lidhje me këtë plan do t’i parashtrojë disa pyetje gjatë bisedimeve që zhvillohen në Bruksel.
“Shkëmbim i mirë me të dërguarin special të BE-së, Miroslav Lajçak gjatë një drekë pune në Prishtinë. Ne e pranojmë propozimin e BE-së për normalizimin e marrëdhënieve ndërmjet Kosovës dhe Serbisë dhe e konsiderojmë atë një bazë të mirë për diskutime të mëtejshme dhe një platformë solide për të ecur përpara”,theksoi Kurti.
