Presidenti i Rusisë, Vladimir Putin, ka njoftuar se ky shtet do të pezullojë pjesëmarrjen nga traktati me Shtetet e Bashkuara të Amerikës, që kufizon arsenalin bërthamor të të dyja vendeve.
“Jam i detyruar të njoftoj se Rusia është duke e pezulluar pjesëmarrjen në traktatin për armët strategjike”, ka thënë ai, pas dhjetëra akuzash ndaj Perëndimit të cilin e akuzoi për luftën në Ukrainë e “agresion”.
Në fjalimin prej një orë e 45 minutash para deputetëve e popullit rus, Putini ka akuzuar SHBA-në e NATO-n për mosbahskëpunim.
Ai ka thënë se Rusia do të kryejë teste të reja nukleare nëse SHBA-ja vepron njësoj.
Çka nënkupton tërheqja e Rusisë nga traktati me SHBA-në për armët bërthamore
Traktati i Rusisë me SHBA-në për armët bërthamore ishte e vetmja marrëveshje e ngelur për armë të tilla mes dy vendeve.
I nënshkruar më 2010 nga ish-presidentët Barack Obama dhe Dmitry Medvedev – traktati qe menduar për të parandaluar luftëra bërthamore. Ai kufizon numrin e kokave bërthamore strategjike që të dyja palët mund t’i zhvillojnë dhe i jep secilit vend fuqinë për ta inspektuar tjetrin.
Marrëveshja hyri në fuqi më 2011 dhe u zgjat dhjetë vjet më pas – edhe pse inspektimet e armëve ishin ndërprerë për shkak të pandemisë.
Dy rivalët e Luftës së Ftohtë zënë gati të gjithë armatimin bërthamor botëror. Rusia në të kaluarën pati shprehur dëshirën për ta zgjatur traktatin – pavarësisht retorikës së ashpër të të dyja palëve për luftën në Ukrainë.
