Ministri i Punëve të Jashtme i Emirateve të Bashkuara Arabe, Sheikh Abdullah bin Zayed Al Nahyan, ka takuar në Athinë kryeministrin grek, Kyriakos Mitsotakis dhe homologun e tij grek, Nikos Dendias, transmeton Anadolu.
Sipas zyrës së kryeministrit grek, Al Nahyan dhe Mitsotakis diskutuan “marrëdhëniet strategjike midis dy vendeve dhe perspektivat për forcimin e mëtejshëm të bashkëpunimit në fushat e investimeve, energjisë dhe ndryshimeve klimatike”.
“Ata gjithashtu shkëmbyen pikëpamje mbi zhvillimet ndërkombëtare dhe rajonale me interes të ndërsjellë, duke përfshirë zhvillimet në Mesdheun Lindor dhe Lindjen e Mesme”, thuhet në njoftim.
Më herët, sipas Ministrisë së Punëve të Jashtme të Greqisë, Al Nahyan dhe Dendias zhvilluan bisedime për çështje me interes të përbashkët, përfshirë përmirësimin e bashkëpunimit ekonomik.
Po ashtu u diskutuan edhe zhvillimet e fundit në Mesdhe, Gjirin Arab dhe Lindjen e Mesme, si dhe de-përshkallëzimi i tensioneve në marrëdhëniet greko-turke.
