Me rastin e 75-vjetorit të saj, Organizata Botërore e Shëndetësisë (OBSH) paralajmëroi sot për një boshllëk në rritje të personelit në sistemin global të kujdesit shëndetësor.
“Deri në vitin 2030, do të ketë një mungesë prej rreth 10 milionë profesionistësh në mbarë botën”, tha në Gjenevë kreu i OBSH-së Tedros Adhanom Ghebreyesus.
“Ndërsa bota po rimëkëmbet nga pandemia e Covid-19, ne u bëjmë thirrje të gjitha vendeve që të mbrojnë dhe investojnë në fuqinë punëtore të kujdesit shëndetësor”, tha Tedros.
Që nga fillimi i pandemisë, sektori shëndetësor ka përjetuar një reduktim të stafit me rreth 50%.
“Edhe para kësaj, shumë prej tyre duhej të punonin me pagesë shumë të vogël dhe në kushte të pasigurta”, tha Tedros.
“Për më tepër, ndërsa gratë përbënin pothuajse 70% të punonjësve shëndetësorë, ato përbënin më pak se një të katërtën e drejtuesve dhe shpesh ishin viktima të ngacmimeve seksuale në punë”, tha ai.
OBSH-ja u themelua më 7 prill 1948, kur hyri në fuqi kushtetuta e OBSH-së.
“Që atëherë, jetëgjatësia është rritur në mënyrë dramatike në mbarë botën, ndërsa vdekshmëria e nënave dhe foshnjave ka rënë ndjeshëm në dekadat e fundit”, tha Tedros.
Suksese të mëdha janë arritur në luftën kundër malaries, tuberkulozit dhe HIV-it.
Megjithatë, ka pasur rritje dramatike të diabetit dhe obezitetit.
Tedros gjithashtu theksoi se pothuajse 2 miliardë njerëz kanë nevojë për ndihmë ekonomike, sepse ata duhet të paguajnë shpenzimet mjekësore nga xhepat e tyre.
Kina të japë informacion për origjinën e COVID-19
Shefi i Organizatës Botërore të Shëndetësisë (OBSH), Tedros Adhanom Ghebreyesus i bëri presion Kinës të enjten për të ndarë informacionin e saj në lidhje me origjinën e COVID-19.
“Pa akses të plotë në informacionin që ka Kina, nuk mund të thuash këtë apo atë”, tha Ghebreyesus në përgjigje të një pyetjeje në lidhje me origjinën e virusit, shkruan Reuters.
“Të gjitha hipotezat janë në tryezë. Ky është pozicioni i OBSH-së dhe kjo është arsyeja pse ne i kemi kërkuar Kinës që të jetë bashkëpunuese për këtë”, shtoi ai.
Virusi u identifikua për herë të parë në qytetin kinez Wuhan në dhjetor 2019, përpara se të përhapej në mbarë botën.
