Irani dërgoi një aeroplan të shtunën në Arabinë Saudite për të transferuar shtetasit e tij të evakuuar nga Sudani për shkak të përleshjeve të vazhdueshme midis ushtrisë dhe grupit paraushtarak Forcat e Mbështetjes së Shpejtë (RSF), transmeton Anadolu.
Televizioni Al-Arabiya i financuar nga Arabia Saudite raportoi se Irani dërgoi avionin për të marrë shtetasit që u sollën në Xhide nga Sudani me një anije që i përkiste Arabisë Saudite.
Zëdhënësi i Ministrisë së Jashtme të Iranit, Nasser Kanaani, tha më herët se 65 shtetas iranianë u sollën nga Khartumi në Port Sudan dhe më vonë u transferuan në portin e Xhides të Arabisë Saudite.
Kanaani falënderoi Arabinë Saudite për bashkëpunimin.
Të paktën 528 njerëz janë vrarë dhe më shumë se 4.500 janë plagosur në luftimet midis dy gjeneralëve rivalë – Abdel-Fattah Burhan, komandanti i forcave të armatosura, dhe Mohammed Hamdan Dagalo, kreu i RSF-së – që nga 15 prilli, sipas Ministrisë së Shëndetësisë të Sudanit.
Një mosmarrëveshje u shfaq muajt e fundit midis ushtrisë dhe paraushtarakëve mbi reformën e sigurisë ushtarake. Reforma parashikon pjesëmarrjen e plotë të RSF-së në ushtri, një nga çështjet kryesore në negociatat e palëve ndërkombëtare dhe rajonale për një kalim në një sundim civil dhe demokratik në Sudan.
Sudani ka qenë pa një qeveri funksionale që nga tetori i vitit 2021, kur ushtria shkarkoi qeverinë kalimtare të kryeministrit Abdalla Hamdok dhe shpalli gjendjen e jashtëzakonshme në një veprim të cilësuar nga forcat politike si një “grusht shteti”.
Periudha kalimtare e Sudanit, e cila filloi në gusht 2019, ishte planifikuar të përfundonte me zgjedhjet në fillim të vitit 2024.
65 Iranian citizens who were residing in #Sudan have returned to Iran with the cooperation of Saudi Arabia. They were transferred from Sudan to the port of Jeddah & then returned to Iran by plane from King Abdullah Air Base in Saudi Arabia.#SudanCrisis#عربستان #ایران pic.twitter.com/VJWLmlcn5m
— Haidar Akarar (@HaidarAkarar) April 30, 2023
