Një zyrtar hungarez ka thënë se është shumë e vështirë për Hungarinë t’i bashkohet rundit të ardhshëm të sanksioneve të Bashkimit Evropian kundër Rusisë, pasi Ukraina e futi në listë të zezë një bankë hungareze.
Ministri i jashtëm hungarez, Peter Szijjarto e përshkroi si të egër masën e Agjencisë Kombëtare të Ukrainës për Parandalimin e Korrupsionit që përfshiu Bankën Hungareze OTP në listën e saj të “sponsorizuesve ndërkombëtarë të luftës”.
Ai shtoi se “për sa kohë që OTP të qëndrojë në këtë listë, do të jetë shumë e vështirë për ne që të hyjmë në negociata për paketën e 11 të sanksioneve” dhe “do të jetë shumë e vështirë për ne të negociojmë kufizime ekonomike që kërkojnë sakrificë shtesë”.
Në një deklaratë në fillim të këtij muaji, NAZK tha se vendimi për të klasifikuar OTP bank si një sponsor ndërkombëtar i luftës ishte “për shkak të pozicionit të menaxhmentit të bankës për të vazhduar operacionet në Rusi”, si dhe “njohjes nga banka të të ashtuquajturit Donetsk dhe “Republikat Popullore” të Luhanskut.
Ministri i jashtëm hungarez hodhi poshtë pretendimet e Kievit të hënën, duke thënë se si banka më e madhe e Hungarisë, “OTP nuk ka shkelur asnjë ligj ndërkombëtar. Veprimet e saj janë plotësisht në përputhje me të gjitha llojet e pritshmërive dhe legjislacionit.”
Szijjártó tha gjithashtu se vendosja e bankës “në listën e sponsorëve ndërkombëtarë të luftës është e papranueshme dhe skandaloze”. /koha
