Gjermania ka kritikuar Izraelin lidhur me një legjislacion të propozuar për të kufizuar financimin e huaj për organizatat e të drejtave të njeriut, transmeton Anadolu.
Në një konferencë për media në Berlin, zëdhënësi i Ministrisë së Punëve të Jashtme, Christian Wagner, tha se Gjermania e sheh me “shqetësim të madh këtë propozim legjislativ”.
“Marrëdhëniet tona të shkëlqyera dypalëshe me Izraelin karakterizohen edhe nga pjesëmarrja e gjallë dhe e larmishme e aktorëve të shoqërisë civile. Ky bashkëpunim rrezikon të dëmtohet nëse fondeve të huaja qeveritare për organizatat joqeveritare do t’u vihen taksë”, tha Wagner.
Zëdhënësi i ministrisë gjermane tha se nëse projektligji miratohet atëherë do të ishte absolutisht i pamundur financimi i shumë projekteve në rajon.
Projektligji i ri tatimor i organizatave joqeveritare, i cili u propozua nga një anëtar i krahut të djathtë në parlamentin izraelit, parashikon vendosjen e taksës në një normë prej 65 për qind ndaj donacioneve nga vendet e huaja, Bashkimi Evropian (BE) dhe Kombet e Bashkuara (OKB).
