Përleshje të armatosura janë raportuar sërish midis ushtrisë sudaneze dhe grupit paraushtarak Forcat e Mbështetjes së Shpejtë (RSF) në kryeqytetin Khartoum sot, thanë dëshmitarë, raporton Anadolu.
Dhuna vjen pavarësisht një marrëveshjeje armëpushimi të ndërmjetësuar nga Arabia Saudite dhe Shtetet e Bashkuara midis dy rivalëve.
Përleshje dhe granatime të rënda u raportuan në disa lagje në Khartoumin jugor, thanë dëshmitarët.
Në Karari, në veri të qytetit Omdurman, u dëgjuan zhurma granatimesh artilerie.
Sipas dëshmitarëve, ushtria sudaneze mbylli urën Al-Fatihab në Nilin e Bardhë, që lidh Khartoumin dhe Omdurmanin.
Në një deklaratë, ushtria tha se forcat e saj zmbrapsën një sulm nga luftëtarët e RSF-së në qytetin El-Obeid.
Në deklaratë thuhet se forcat e RSF-së kanë pësuar humbje të mëdha në sulm.
Nuk kishte asnjë koment nga RSF-ja mbi këtë zhvillim.
Sipas mjekëve vendas, të paktën 863 civilë janë vrarë dhe 3.531 të tjerë janë plagosur që nga shpërthimi i konfliktit më 15 prill.
Luftimet në Sudan filluan pas një mosmarrëveshjeje në muajt e fundit midis ushtrisë dhe RSF-së rreth integrimit të grupit paraushtarak në forcat e armatosura, një kusht kyç i marrëveshjes së tranzicionit të vendit me grupet politike.
Sudani ka qenë pa një qeveri funksionale që nga tetori i vitit 2021, kur ushtria shkarkoi qeverinë kalimtare të kryeministrit Abdalla Hamdok dhe shpalli gjendjen e jashtëzakonshme, një lëvizje kjo e cilësuar nga forcat politike si “grusht shteti”.
Periudha e tranzicionit e Sudanit, e cila filloi në gusht 2019 pas rrëzimit të presidentit Omar al-Bashir, ishte planifikuar të përfundonte me zgjedhje në fillim të vitit 2024.
