I dërguari i posaçëm i Kinës për Euroazinë, Li Hui, ka bërë thirrje për ndërprerjen e dërgesave të armëve në rajonin e konfliktit, në Ukrainë, pas vizitave muajin e kaluar në Ukrainë, Rusi dhe disa vende të BE-së.
“As Rusia dhe as Ukraina nuk e kanë mbyllur derën e negociatave”, tha Li në Pekin.
“Ne duhet të ndalojmë dërgimin e armëve në fushën e betejës, përndryshe do të rrisim rrezikun e një përshkallëzimi të tensioneve”, tha ai.
I dërguari i posaçëm bëri thirrje për armëpushim dhe bisedime për paqe por, në përputhje me politikën e Pekinit, nuk e dënoi pushtimin rus.
Li vuri në dukje efektet e konfliktit në sigurinë bërthamore, furnizimet me ushqime dhe çështjet humanitare.
Gjatë udhëtimit të tij, Li zhvilloi bisedime në Gjermani, Poloni, Francë dhe Bruksel, Ukrainë dhe Rusi. /atsh
