Këshilli i Sigurimit i Kombeve të Bashkuara (OKB) do të mblidhet të premten për të diskutuar përshkallëzimin vdekjeprurës pas bastisjeve izraelite në qytetin e pushtuar Jenin në Bregun Perëndimor, transmeton Anadolu.
Misioni i Mbretërisë së Bashkuar në OKB, i cili mban presidencën e radhës të organit për muajin korrik, tha se Këshilli i Sigurimit i OKB-së do të takohet në konsultime të mbyllura.
Takimi u kërkua nga Emiratet e Bashkuara Arabe.
Në muajt e fundit, tensionet janë rritur në të gjithë Bregun Perëndimor të pushtuar mes bastisjeve të përsëritura izraelite në qytetet palestineze.
Sot, forcat izraelite nisën operacionin e tyre më të madh ushtarak në Jenin, sipas Ministrisë së Shëndetësisë së Palestinës, duke vrarë të paktën 10 palestinezë dhe duke plagosur më shumë se 100 të tjerë.
Pothuajse 190 palestinezë janë vrarë nga forcat izraelite që nga fillimi i këtij viti. Të paktën 25 izraelitë gjithashtu janë vrarë në disa sulme gjatë të njëjtës periudhë.
