Kina ka përfshirë Turqinë si destinacion për aktivitetet e turizmit në grup për vendet e huaja, të cilat i pezulloi pas shpërthimit të pandemisë së COVID-19, transmeton Anadolu.
Ministria e Kulturës dhe Turizmit të Kinës në një njoftim që publikoi paraqiti listën e tretë të vendeve ku agjencitë e udhëtimeve dhe operatorët turistikë kombëtarë mund të organizojnë udhëtime në grup për qytetarët kinezë.
Në listën që përfshin 78 vende në Azi, Evropë, Afrikë, Amerikën e Veriut dhe të Jugut si dhe Oqeani, përfshihet edhe Turqia.
Me rregulloren e cila hyn në fuqi që nga sot, agjencitë e udhëtimeve dhe operatorët turistikë do të mund të vazhdojnë shitjen e paketave të udhëtimeve dhe akomodimit përmes organizimeve të udhëtimeve në grup në vendet që përshihen në listë.
Aktivitetet e turizmit në grup për vendet e huaja në Kinë, mund të organizohen vetëm me lejen dhe kontrollin e qeverisë qendrore.
Pas fillimit të pandemisë së COVID-19 në mars 2020, Kina mbylli kufijtë e saj për botën, pezulloi të gjitha vizat dhe vendosi kufizime për udhëtimet e qytetarëve kinezë jashtë vendit. Në kuadër të masave u pezulluan udhëtimet në grup të zhvilluara në vendet e huaja.
Më 8 janar 2023 vendi i dha fund trajtimit të COVID-19 si një “pandemi e kategorisë A”, rihapi kufijtë e tij si dhe hoqi masat dhe kufizimet e vendosura në kuadër të ligjit për shëndetin dhe karantinën kufitare.
