E në funksion të kryerjes së përgatitjeve për nisjen e vitit të ri shkollor, pjesa më e madhe e mësimdhënësve nuk po paraqiten në vendet e tyre të punës. Nga pesë shkolla të kryeqytetit sa i vizitoi ekipi i KOHËS në mëngjesin e së martës, ka hasur vetëm në tre mësimdhënës që ishin në vendin e tyre të punës, ani se pushimi u ka përfunduar më 15 gusht. E njohës të çështjes së arsimit shprehin vërejtjen se përgatitjet për mësim para fillimi të viti shkollor nuk bëhet fare, ndërkaq për këtë fajësojnë menaxhmentin e shkollave.
Vetëm tre mësimdhënës i ka hasur ekipi i KOHËS mëngjesin e së mërkurës në vizitat që i ka realizuar në pesë shkolla të kryeqytetit. Sallat e mësimdhënësve në këto institucione arsimore ishin kryesisht të zbrazura, ani se pushimi për ta përfundoi më 15 gusht.
Sipas Ministrisë së Arsimit, mësimdhënësve u lejohet që ta shfrytëzojnë të drejtën për pushim të paraparë me Ligjin e Punës, nga 15 korriku deri më 15 gusht. E që pas kësaj data, ata parashihet se duhet të paraqiten në objektet shkollore, për të bërë planifikimet dhe përgatitjet profesionale për vitin e ri shkollor.
E Betim Sylejmani, drejtori i gjimnazit Sami Frashëri, thotë se këto përgatitje, mësimdhënësit mund t’i bëjnë edhe nga shtëpia.
“Pushimi është një muaj, 15 korrik-15 gusht, por ka raste pas 15 korrikut mësimdhënësit paraqiten në punë për nevoja të ndryshme siç është konkursi për pranimin e nxënësve, apo ndonjë punë tjetër e cila paraqitet gjatë pushimit. Përndryshe mësimdhënësit paraqiten pas datës 15 gusht në shkollë, i kryejnë detyrat e tyre e përgatitjet e nevojshme dhe gjithsesi takimet që mbahen nga shkollat”, ka thënë Sylejmani.
Mungesën e paraqitjes së mësimdhënëseve, nga menaxhmenti i disa shkollave e arsyetuan me pamundësinë e daljes në vende të punës, si rrjedhojë e renovimeve që po bëhen në objekte.
Por ish-zëvendësministri i Arsimit, Xhavit Rexhaj, thotë se përgatitjet për mësim para fillimi të viti shkollor nuk bëhet fare, e për këtë i fajëson institucionet arsimore për keq organizim.
“Planifikimi besoj që bëhet 30 për qind, në Kosovë nuk planifikohet mësimi mirë, është kohë e vjedhur. Përgatitja për mësim nuk bëhet fare, përgatitjen e bëjnë gjatë vitit shkollor, jo para vitit shkollor. Zhvillimi profesional për arsye të ndryshme zhvillohet minimalisht, diku 20 për qind. Besoj që këto do të ishin përqindjet se sa e shfrytëzojnë mësimdhënësit në mënyrë konstruktive kohën që iu mbetet gjatë pushimeve”, ka thënë Rexhaj.
E Dukagjin Pupovci, ish-zëvendësministër i Arsimit, e kualifikon mit të krijuar nga shoqëria perceptimin se puna e mësimdhënësit kryhet vetëm në klasa me nxënës. Ai mosparaqitjen e tyre në objektet shkollore gjatë periudhës verore e sheh si problem të mungesës së organizimit të aktiviteteve nga menaxhmenti i shkollave.
“Perceptime të tilla mund të ketë, por ato janë të gabuara. Mësimdhënësi vërtetë i ka 20 orë mësimi në javë, por duhen edhe 20 orë të tjera mbase edhe më shumë për përgatitje, kontrollim detyrash, komunikim me prindër, etj. Mësimdhënësit shpesh këto orët tjera i realizojnë jashtë orarit të rregullt të punës. Sa u përket pushimeve të gjata, ato mund të “shkurtohen” nëse shkollat organizojnë aktivitete kuptimplote për mësimdhënësit, siç janë: trajnimet, konsultimet në funksion të planifikimit, mësim vazhdues për nxënësit me nota të dobëta, e të ngjashme. Por, nëse aktivitete të tilla nuk ka, atëherë është joproduktive të kërkohet prania e mësimdhënësve në shkollë kur nuk ka mësim”, ka thënë Pupovci.
Organizata ndërkombëtare për Bashkëpunim dhe Zhvillim Ekonomik, OECD, thekson se mësimdhënia është profesion që kërkon zhvillim profesional e aftësim të përvitshëm për t’iu përshtatur zhvillimeve bashkëkohore, për t’i përvetësuar metodat moderne që nxisin interesimin e nxënësve në procesin mësimor.
