Presidenti brazilian Luiz Inacio Lula da Silva tha të shtunën se homologu i tij rus Vladimir Putin nuk do të arrestohet në Brazil nëse ai merr pjesë në samitin e G20 që do të mbahet në Rio de Zhaneiro në 2024.
Në një intervistë për Firstpost TV në margjinat e samitit aktual të Grupit 20 në Nju Delhi të Indisë, Lula tregoi se Putini do të ftohet në samitin e ardhshëm, duke shtuar se ai vetë planifikon të marrë pjesë në takimin e BRICS që do të mbahet vitin e ardhshëm në Rusi.
“Unë mendoj se Putini mund të shkojë pa probleme në Brazil,” vuri në dukje Lula. “Ajo që mund t’ju them është se nëse unë jam presidenti i Brazilit dhe ai vjen në Brazil, nuk ka mundësi të arrestohet”.
Gjykata Ndërkombëtare Penale lëshoi një urdhër arresti kundër presidentit rus në mars, duke e akuzuar atë për dëbimin e qindra fëmijëve nga Ukraina. Moska mohon se forcat e saj kanë kryer krime lufte ose kanë marrë me forcë fëmijë nga Ukraina.
Putin ka shmangur pjesëmarrjen në disa takime ndërkombëtare dhe nuk ka qenë as i pranishëm në samitin e G20 në Nju Delhi. /abcnews
