Presidenti i Azerbajxhanit, Ilham Aliyev, ka thënë se të drejtat e armenëve që jetojnë në Karabak do të mbrohen “brenda kornizës së legjislacionit të vendit dhe detyrimeve ndërkombëtare”, transmeton Anadolu.
Gjatë një takimi me një delegacion amerikan, Aliyev ka theksuar se si pakicat e tjera etnike që jetojnë në Azerbajxhan, të drejtat e armenëve do të sigurohen brenda kornizës së legjislacionit të vendit dhe detyrimeve ndërkombëtare, tha në një deklaratë zyra presidenciale e Azerbajxhanit.
Aliyev ka pritur përfaqësuesen speciale të presidentit amerikan dhe administratoren e Agjencisë Amerikane për Zhvillim Ndërkombëtar (USAID), Samantha Power, Ndihmëssekretaren e Shtetit për Çështjet Evropiane dhe Euroaziatike, Yuri Kim, dhe Këshilltarin e Lartë të Departamentit të Shtetit për Negociatat e Kaukazit, Louis Bono.
Ata kanë shkëmbyer mendime lidhur me situatën aktuale në rajonin e Karabakut, pas masave kundër terrorizmit.
Presidenti Aliyev ka thënë se janë sekuestruar pajisje ushtarake, municione dhe furnizime ushtarake, duke shtuar se përfaqësuesit ushtarakë të akredituar në vend dhe përfaqësuesit e Zyrës së Koordinatorit të Përhershëm të OKB-së i kanë parë armët dhe pajisjet ushtarake, thuhet në deklaratë.
Në deklaratë thuhet më tej se Aliyev ka deklaruar gjithashtu se civilët kanë mbetur të padëmtuar gjatë operacioneve antiterroriste, me fokus vetëm në shënjestrimin e grupeve të armatosura të paligjshme armene dhe instalimeve ushtarake.
Aliyev ka përmendur se diskutimet rreth riintegrimit janë në progres midis përfaqësuesve të Azerbajxhanit dhe popullsisë armene në Karabak.
“Duke nënvizuar se puna për rivendosjen e infrastrukturës në zonë është duke u zbatuar, presidenti Ilham Aliyev ka thënë se Azerbajxhani u ka dërguar ndihma humanitare banorëve armenë”, thuhet në deklaratë.
Aliyev ka shprehur gatishmërinë e Bakut për të organizuar një vizitë të Zyrës së Koordinatorit të Përhershëm të OKB-së, e cila është e akredituar në vend, në rajonin e Karabakut të Azerbajxhanit në të ardhmen e afërt.
