Presidenti i ShBA-së, Joe Biden, dhe homologu i tij kinez, Xi Jinping, u takuan sot për herë të parë ballë për ballë me shpresën për të lehtësuar disa nga faktorët stresues që definojnë marrëdhëniet ShBA-Kinë, raporton Anadolu.
Biden dhe Xi u takuan në margjinat e samitit të Bashkëpunimit Ekonomik Azi-Paqësor në San Francisko të Kalifornisë, takimi i tyre i parë që nga takimi i fundit me njëri-tjetrin në nëntor 2022 në Bali të Indonezisë.
“Nuk ka asnjë zëvendësim për diskutimet ballë për ballë. Unë i kam konsideruar gjithmonë diskutimet tona si të drejtpërdrejta dhe të sinqerta dhe gjithmonë i kam vlerësuar ato”, i tha Biden homologut Xi në një fjalim të shkurtër para takimit të tyre me dyer të mbyllura.
“Zoti president, ne njihemi prej kohësh. Jo gjithmonë kemi rënë dakord, gjë që nuk ka çuditur askënd, por takimet tona kanë qenë gjithmonë të sinqerta, të drejtpërdrejta dhe të dobishme. Unë kurrë nuk kam dyshuar në atë që më keni thënë për sa i përket natyrës së çiltër në të cilën ti flet”, shtoi ai.
Takimi vjen ndërsa Kina dhe ShBA-ja po kërkojnë të menaxhojnë konkurrencën që është bërë faktor për të përcaktuar lidhjet e tyre dypalëshe. Ndër të tjera, në takim pritet të diskutohen tensionet mbi Tajvanin dhe Detin e Kinës Jugore, çështjet ekonomike dhe tregtare, dialogu ushtarak i nivelit të lartë dhe konflikti i Gazës.
Biden dhe zyrtarët e tij të lartë thanë përpara takimit se Washingtoni po kërkon të rivendosë komunikimet ushtarake, të cilat Pekini i pezulloi si hakmarrje për rrëzimin e një balone kineze në shkurt, që administrata Biden tha se ishte pjesë e një programi global mbikëqyrjeje.
Kina ka thënë se ishte një balonë meteorologjike që doli nga kursi kur kaloi tranzit në ShBA-në kontinentale.
Duke folur pas Bidenit, Xi tha se marrëdhënia ShBA-Kinë është “marrëdhënia dypalëshe më e rëndësishme në botë”, duke thënë se ajo duhet të zhvillohet “në një mënyrë që të përfitojnë dy popujt tanë dhe të përmbushë përgjegjësinë tonë për përparimin njerëzor”.
“Për dy vende të mëdha si Kina dhe Shtetet e Bashkuara, t’i kthejnë shpinën njëri-tjetrit nuk është një opsion. Është joreale që njëra palë të rimodelojë tjetrën. Dhe konflikti dhe konfrontimi kanë pasoja të padurueshme për të dyja palët”, tha ai, sipas prononcimit të përkthyer.
“Unë jam ende i mendimit se konkurrenca e madhe e vendeve nuk është trendi mbizotërues i kohës aktuale dhe nuk mund të zgjidhë problemet me të cilat përballen Kina dhe Shtetet e Bashkuara, apo bota në përgjithësi”, shtoi ai.
Komentet duket se ishin një aludim për theksimin e përsëritur të Bidenit se “konkurrenca” midis kombeve “nuk kalon në konflikt”, një frazë që ai përsëriti sot.
“Ne gjithashtu duhet ta menaxhojmë atë me përgjegjësi, konkurrencën. Kjo është ajo që Shtetet e Bashkuara duan dhe ne synojmë të bëjmë. Unë gjithashtu besoj se është ajo që dëshiron bota”, tha ai.
Pekini dhe Washingtoni kanë mbajtur disa raunde bisedimesh në nivele të larta për të realizuar udhëtimin e presidentit kinez Xi në ShBA, i pari i tij që nga viti 2015.
