Përveç goditjes së pamëshirshme ndaj Rripit të Gazës së rrethuar me bombardime që nga 7 tetori, ushtria izraelite ka intensifikuar fushatën e saj ushtarake kundër Bregut Perëndimor të pushtuar, duke vrarë dhe arrestuar qindra palestinezë.
Sipas gazetarëve të Anadolu-t, ushtria izraelite e ktheu të gjithë Bregun Perëndimor në një “fushë beteje” përmes inkursioneve të saj të përditshme, duke ngritur post-blloqe ushtarake për të ndërprerë lidhjen midis zonave palestineze dhe duke penguar lëvizjen e tyre.
Nga ana tjetër, ushtria izraelite gjithashtu mbështeti kolonët izraelitë në dhunën e tyre kundër fermerëve palestinezë dhe në shumë raste kolonët sulmuan dhe hapën zjarr duke vrarë dhe plagosur disa palestinezë.
Derisa lufta izraelite në Gaza mbush dy muaj, numri i palestinezëve të vrarë dhe të plagosur në Bregun Perëndimor vazhdon të rritet çdo ditë.
Së fundmi, Ministria palestineze e Shëndetësisë njoftoi se numri i përgjithshëm i palestinezëve të vrarë nga forcat izraelite dhe kolonët në Bregun Perëndimor që nga fillimi i vitit është rritur në 469.
Sulmet e kolonëve hebrenj
Që nga 7 tetori, sipas Komisionit të Kolonizimit dhe Rezistencës së Murit, kolonët hebrenj kryen rreth 610 sulme në të gjithë Bregun Perëndimor, përfshirë Kudsin Lindor të pushtuar.
Dhuna nga kolonët përfshin hapjen e zjarrit të drejtpërdrejtë ndaj palestinezëve, sulmin ndaj pronave dhe tokave të tyre bujqësore, hedhjen e gurëve drejt automjeteve të palestinezëve, si dhe djegien e makinave dhe shtëpive palestineze.
Vlerësimet zyrtare palestineze thonë se dhuna e kolonëve ka detyruar të paktën 143 familje palestineze, që përbëhen nga 1.014 individë, të largohen nga shtëpitë e tyre të vendosura në zonat e kontrolluara nga ushtria izraelite në Bregun Perëndimor.
Burgosjet
Derisa ushtria izraelite po kryen bastisje nëpër Bregun Perëndimor, mbi 3.580 palestinezë janë arrestuar që nga 7 tetori.
Sipas vlerësimeve zyrtare palestineze, autoritetet izraelite mbajnë gjithsej 7.800 palestinezë në burg, përfshirë 33 gra, 166 fëmijë dhe 2.873 të tjerë të mbajtur nën politikën e paraburgimit administrativ pa asnjë akuzë apo gjykim.
Që nga 7 tetori, sipas grupeve palestineze, të paktën gjashtë të burgosur palestinezë janë vrarë në burgjet izraelite si pasojë e torturave.
Bllokada
Pas 7 tetorit, ushtria izraelite bllokoi Bregun Perëndimor duke ngritur post-blloqe ushtarake dhe duke pamundësuar qasjen në disa zona.
Gazetarët e Anadolu-t raportojnë se palestinezët janë të detyruar të përdorin rrugë alternative rurale dhe të pa asfaltuara për të arritur në destinacionet e tyre.
Në këtë situatë, një palestinez që udhëtonte nga qyteti Nablus drejt qytetit Ramallah në më pak se 40 minuta para 7 tetorit, tani i duhen rreth dy orë për një udhëtim të tillë.
Sulmi në Gaza
Të premten e kaluar, Izraeli rifilloi ofensivën ushtarake në Rripin e Gazës së rrethuar pas përfundimit të një pauze humanitare 1-javore me grupin palestinez Hamas.
Të paktën 16.248 palestinezë janë vrarë dhe më shumë se 43.616 të tjerë janë plagosur në sulmet e pamëshirshme ajrore dhe tokësore në enklavë që nga 7 tetori pas një sulmi ndërkufitar nga Hamasi.
