Ushtria izraelite u tërhoq nga kampi i refugjatëve Al-Faria, që ndodhet pranë qytetit Tubas në Bregun Perëndimor të pushtuar, transmeton Anadolu.
Bastisja e kampit të refugjatëve Al-Faria, në të cilën forcat izraelite hapën zjarr dhe vranë 4 palestinezë, përfshirë dy fëmijë, zgjati rreth dy orë. Forcat izraelite u tërhoqën plotësisht nga kampi.
Sipas informacionit të marrë nga burime lokale, forcat izraelite arrestuan 3 palestinezë gjatë bastisjes në kamp.
Dëshmitarët okularë njoftuan se midis ushtarëve dhe grupeve të armatosura palestineze në kampin e bastisur nga ushtria izraelite shpërtheu një konflikt, ushtria rrethoi kampin dhe vendosi snajperë në pika të ndryshme.
Ministria palestineze e Shëndetësisë njoftoi se ushtria izraelite vrau 4 palestinezë, dy prej të cilëve fëmijë, si pasojë e zjarrit të hapur në kampin e refugjatëve Al-Faria.
Gjysmëhëna e Kuqe Palestineze njoftoi se 4 nga 8 të plagosurit ndërruan jetë ndërsa gjendja e të tjerëve është “kritike”.
